Sló út meistarana eftir á­skorun þjálfarans

Wembanyama tók áskorun þjálfarans Mitch Johnson um að skora meira en tuttugu stig, eftir vonbrigðaframmistöðu Frakkans í fimmta leik, og átti ríkan þátt í 111-103 sigri San Antonio í nótt.

Þar með spilar San Antonio til úrslita í fyrsta sinn síðan árið 2014 og í úrslitaeinvíginu mætast sömu lið og síðast þegar Knicks komust í úrslit, árið 1999.

„Að vinna Larry O'Brien-bikarinn [NBA-meistaratitilinn] er æskudraumur og að eiga raunverulegan möguleika á því, að eiga áþreifanlegan möguleika á að vinna hann – það er tækifæri lífsins,“ sagði Wembanyama sem spilar nú til úrslita í fyrsta sinn, eftir að hafa verið valinn fyrstur í nýliðavalinu árið 2023.

Wembanyama hafði skorað 41 stig í fyrsta leiknum gegn Oklahoma og 33 stig í fjórða leik, og nú eru meistararnir úr leik.

„Það sem ég hef lært er að ég get yfirstigið hindranir sem ég vissi ekki að gætu orðið svona háar,“ bætti Wembanyama við.

„Ég fann innri styrk. Þrautseigju. Ég vissi það reyndar fyrir, en að gera það á þessu stigi… þetta er besti körfubolti sem spilaður er á jörðinni um þessar mundir. Og það fáránlega er að ég vil gera þetta 15 eða 20 sinnum í viðbót,“ sagði þessi 22 ára gamli Frakki.