Verð­mætasta fyrir­tæki heims slær enn eitt metið

Umrætt uppgjör nær yfir febrúar, mars og apríl. Á þessum mánuðum hagnaðist Nvidia um 58,32 milljarða dala. Það samsvarar um 7,2 billjónum króna (tólf núll), eða rúmum sjö þúsund milljörðum.

Landsframleiðsla Íslands í fyrra var tæpar fimm billjónir króna.

Samhliða uppgjörinu fyrir síðasta ársfjórðung uppfærðu forsvarsmenn Nvidia spár sínar fyrir yfirstandandi ársfjórðung og búast nú við meiri tekjum en áður.

Áhugasamir geta virt uppgjörið fyrir sér hér á vef Nvidia.

Í samtali við fjárfesta í kvöld sagði Jensen Huang, forstjóri Nvidia, að eftirspurn eftir tölvuflögum frá fyrirtækinu hefði náð nýjum hæðum. Það væri allt vegna aukinnar notkunar gervigreindar en vegna þessa er verið að reisa fjölda gagnavera víðsvegar um heiminn, samkvæmt frétt Wall Street Journal.

Nvidia varð í lok október í fyrra fyrsta fyrirtæki heims til að verða meira en fimm billjóna dala virði. Það samsvaraði þá um 615 billjónum króna. Núna er virði hlutabréfa fyrirtækisins metið á rúmlega 5,4 billjónir dala.

Alphabet, móðurfélag Google, er næstverðmætasta fyrirtæki heims. Það er metið á 4,7 billjónir dala.

Virði hlutabréfa Nvidia hefur hækkað gífurlega í virði á undanförnum árum, samhliða miklum vexti í gervigreindargeiranum. Fyrirtækið framleiðir tölvubúnað sem er einkar vinsæll í gagnaver sem notuð eru til að keyra mállíkön heimsins.

Þar er um að ræða örflögur og skjákort, sem eru sérstaklega vinsæl þegar kemur að gagnaverum fyrir gervigreind.

Í lok ársins 2022 var virði Nvidia um fjögur hundruð milljarðar dala. Á um það bil þremur og hálfu ári hefur virði fyrirtækisins því aukist um einhverja fimm þúsund milljarða dala.

Þessi gífurlega virðisaukning hefur leitt til áhyggja um bólumyndun en sífellt meiri hagnaður Nvidia hefur slegið mjög á þessar áhyggjur.  Tekjur Nvidia jukust um 21 prósent frá síðasta uppgjörsfjórðung en heil 92 prósent séu þær bornar saman við sama tímabil í fyrra.

Nýr búnaður fyrir gervigreind og aukin samkeppni

Á undanförnum mánuðum hafa forsvarsmenn Nvidia opinberað nýjan tölvubúnað sem hefur sérstaklega verið hannaður með gagnaver fyrir gervigreind í huga. Er þar um að ræða nýja vefþjóna og skjáskort, sem hafa mikla reiknigetu. Á næstu mánuðum er von á fleiri slíkum vörum.

Í frétt WSJ segir þó að forsvarsmenn annarra tæknirisa, fyrirtækja eins og Amazon og Google, hafi nýverið opinberað áætlanir um aukna framleiðslu á eigin tölvubúnaði fyrir gervigreind.

Þá hefur einstaklega mikið verið um samruna og kaup á fyrirtækjum á þessu sviði.