Upp­gjörið: Valur - ÍBV 27-35 | Ólöf Maren skellti í lás og ÍBV strengdi líf­línu

ÍBV er enn á lífi í einvígi sínu við Val um Íslandsmeistaratitilinn í handbolta kvenna. Eyjakonur unnu sannfærandi þegar liðin áttust við í þriðja leik sínum í úrslitum Olís-deildarinnar í N1-höllinni að Hlíðarenda í kvöld. Staðan í einvígi liðanna er þar af leiðandi 2-1 fyrir Val.

Gestirnir frá Vestmannaeyjum hófu leikinn mun betur og Eyjakonur voru greinilega staðráðnir í að Íslandsmeistarabikarinn færi ekki á loft á Hlíðarenda í kvöld.

Sterk vörn ÍBV og átta varðir boltar hjá Ólöfu Maren Bjarnadóttur lögðu grunninn að því að ÍBV náði mest sex marka forskoti, 10-4, um miðjan fyrri hálfleik.

Þá tók Anton Rúnarsson, þjálfari Vals, leikhlé og kveikti líf í leikmönnum sínum. Valskonur náðu vopnum sínum og Guðrún Hekla Traustadóttir átti góða innkomu af varamannbekknum.

Sandra Erlingsdóttir skoraði síðasta mark fyrri hálfleiks og ÍBV var 15-14 yfir þegar liðin röltu til búningsklefa í hálfleik.

Leikmenn ÍBV komu af krafti úr blokkunum eftir hálfleikinn og gestsirnir voru 27-19 yfir þegar rúmlega tíu mínútur voru liðnar af seinni hálfleiknum.

Ölöf Maren hélt áfram að verja vel og Sandra Erlingsdóttir dró vagninn í sóknarleik Eyjaliðsins. ÍBV leit aldrei til baka og innbyrti að lokum átta marka sigur, 35-27, og liðin þurfa þar af leiðandi að mætast í fjórða skipti í Vestmannaeyjum á þriðjudaginn kemur.

Sandra Erlingsdóttir: Fannst við eiga inni í síðustu leikjum

„Okkur fannst við eiga mikið inni og kannski meira skilið í fyrstu tveimur leikjunum og við vorum staðráðnar í að vinna sigur í kvöld. Við náðum upp góðri vörn og sýndum skynsemi í sóknarleiknum. Það var lykillinn að þessum sigri,“ sagði Sandra Erlingsdóttir, fyrirliði ÍBV, eftir góðan sigur liðsins. 

„Ólöf Maren var svo frábær á bakvið vörnina. Ólöf er búin að vera geggjuð eftir að Mellý meiddist. Eftir að hafa lítið spilað í vetur hefur Ólöf aldeilis stigið upp og það er gulls ígildi að hafa hana í markinu. Ólöf hefur neglt þetta og er mesta drottningin,“ sagði Sandra um liðsfélaga sinn. 

„Við byrjuðum leikinn sterkt en Valsliðið er sterkt og náði að koma til baka og jafna metin. Við komum hins vegar af krafti inn í seinni hálfleikinn og náum að spila að halda dampi allan leikinn sem við gerðum ekki í fyrstu tveimur leikjunum. Það er mjög jákvætt,“ sagði leikstjórnandinn. 

„Það er líka gott að fá einn svona öruggan sigur og geta aðeins andað léttar í lokin eftir alla þessar hörku rimmur við Hauka og svo Val upp á síðkastið. Nú förum við bara aftur til Eyja og jöfnum metin í leiknum á þriðjudaginn,“ sagði hún um framhaldið. 

Anton Rúnarsson: Vorum ólíkar sjálfum okkur

„Leikurinn var svo sem í jafnvægi í fyrri hálfleik og það voru sveiflur líkt og í fyrstu tveimur leikjunum. Við erum í fínum málum í hálfleik en svo vorum við ólíkar sjálfum okkur í seinni hálfleiknum,“ sagði Anton Rúnarsson, þjálfari Vals. 

„Varnarleikurinn var götóttur, orkustigið var ekki alveg nógu gott og við náðum ekki að nýta færin okkar nógu vel. Það vantaði bara ákefð í það sem við vorum að gera þegar líða tók á leikinn og því fór sem fór,“ sagði Anton enn fremur. 

„Það er mikið undir hjá báðum liðum og svo sem ekkert hátt spennustig hjá okkur eða værukærð þrátt fyrir að við værum 2-0 yfir. Þetta var bara jafn leikur og þær náðu yfirhöndinni í seinni hálfleik. Bara eitt tap og áfram gakk,“ sagði hann. 

„Við förum bara yfir það við náðum ekki að framkvæma nógu vel í þessum leik á næstu dögum og fínstillum fyrir næstu viðureign. Við erum enn í góðri stöðu í þessu einvígi og stefnum á að klára dæmið í Eyjum í næsta leik,“ sagði Anton. 

Atvik leiksins

Það var svo sem ekkert eitt atvik frekar en annað sem gladdi augað eða var vendipunktur að þessu sinni. Liðsvörn ÍBV var til fyrirmyndar og það er gaman að sjá Ólöf Maren stela senunni. 

Stjörnur og skúrkar

Sandra fór fyrir sínu liði og skoraði níu mörk auk þess að eiga fjölmargar stoðsendingar á samherja sína. Meðal annars Britney Cots á línunni en Brit skoraði sex mörk ásamt því að vera öflug í varnarleik ÍBV.

Birna Berg Haraldsdóttir og Agnes Lilja Styrmisdóttir fundu fjölina sína en Birna Berg skilaði sjö mörkum á töfluna og Agnes Lilja sex. Að öðrum ólöstuðum átti hins vegar Ólöf Maren stærsta þáttinn að sigla þessum sigri í höfn. Ólöf varði 16 skot og dró tennurnar úr leikmönnum Vals. 

Elísa Elíasdóttir var markahæst hjá Val með sex mörk og Arna Karitas Eiríksdóttir kom næst með sín fimm mörk. 

Dómarar leiksins

Dómarar leiksins, þeir. Sigurður Hjörtur Þrastason og Svavar Ólafur Pétursson, voru röggsamir og á sama tíma stóískt rólegir í ákvörðunartökum sínum. Fumlaus dómgæsla þeirra færir þeim átta í einkunn fyrir sín störf.

Stemming og umgjörð

Valsmenn voru léttir í lundu og strætóskýlið hjá stuðningsmönnum Vals var vel mannað. Það heyrðist vel í Valsmönnum í stúkunni. Eyjamenn létu ekki sig svo ekki vanta. Dönnuð framkoma hjá gestunum að þessu sinni en þeir létu vel í sér heyra með kraftmiklum hvatnignarópum.