Þristur í lokin og Sindri eða Breiða­blik í Bónus-deildina

Breiðablik var þegar komið í úrslitaeinvígið en Sindri tryggði sig þangað í kvöld með 96-95 útisigri gegn Selfossi.

Þar með vann Sindri einvígið við Selfoss 3-1 en þetta var fyrsti sigur einvígisins á útivelli, og tæpara gat hann ekki staðið.

Selfyssingar voru nefnilega yfir þegar Sindri fór í lokasókn sína, 95-93, en Srdan Stojanovic skoraði þriggja stiga sigurkörfu þegar sjö sekúndur voru eftir. Selfyssingar höfðu komist í 93-86 og voru 78-67 yfir fyrir lokaleikhlutann sem gestirnir unnu hins vegar, 29-17.

Sindramenn enduðu í 2. sæti 1. deildarinnar, eftir tap gegn deildarmeisturum Hattar í lokaumferðinni, en Breiðablik endaði í 5. sætinu.

Gísli Þórarinn Hallsson var stigahæstur Sindra með heil 28 stig í kvöld og Jason Gigliotti skoraði 21, tók 12 fráköst og gaf 6 stoðsendingar. Hjá Selfossi var Steven Lyles stigahæstur með 34 stig.