Krafta­verkið í Barcelona: „Næst er ég undir öllu Haukaliðinu“

Palau Blaugrana, heimavöllur Barcelona, var sannkallað gin úlfsins á þessum tíma. Þegar Haukar mættu þangað í leik í Meistaradeild Evrópu í nóvember 2003 hafði Barcelona unnið fjörutíu Evrópuleiki í röð á heimavelli, eða alla heimaleiki sína síðan í mars 1997.

Þrátt fyrir það var enginn beygur í Haukum sem náðu jafntefli gegn Barcelona, 27-27. Andri, þá nítján ára, skoraði jöfnunarmarkið með skoti fyrir aftan bak í hraðaupphlaupi í þann mund sem leiktíminn rann út.

„Allt sem ég man fyrir og eftir er eitthvað sem ég hef séð í sjónvarpi. Þetta er svolítið mín upplifun,“ sagði Andri er hann rifjaði leikinn 22. nóvember 2003 upp.

Eftir að Andri kom boltanum í netið hópuðust samherjar hans ofan á hann við hliðarlínuna.

„Boltinn endar í höndunum á mér og næst er ég undir öllu Haukaliðinu. Þetta er skemmtileg raunminning en þegar maður horfir á þetta í sjónvarpinu sér maður þetta sekúndu fyrir sekúndu og þá er þetta allt mjög dramatískt og skemmtilegt augnablik,“ sagði Andri. 

„Það er ekkert gaman að fá heilt handboltalið ofan á sig. Þetta var ekkert þægileg upplifun en adrenalínið var á fullu þannig að sársaukinn var ekki mikill.“

Andri vann fjölda titla sem leikmaður Hauka og var hluti af liði U-18 ára landsliði Íslands sem varð Evrópumeistari 2003. Hann lék einnig með Val og norska liðinu Fyllingen.

Brot úr „Kraftaverkinu í Barcelona“, fjórða þætti Augnablikanna, má sjá í spilaranum hér fyrir ofan. Þáttinn í heild sinni má nálgast á efnisveitu Sýnar Sport.