Þrota­bú Wow air verður af hundruðum milljóna króna

Héraðsdómur hafði dæmt kröfuhafana til að greiða þrotabúinu fleiri hundruð milljóna auk dráttarvaxta og ekki er óvarlegt að áætla að þrotabúið verði af vel rúmlega milljarði króna vegna viðsnúningsins. 

Dómar Landsréttar í málunum sjö voru kveðnir upp klukkan 15. Þeir hafa ekki verið birtir og því liggja forsendur þeirra ekki fyrir að svo stöddu.

Hæstiréttur muni vilja eiga síðasta orðið

Sveinn Andri Sveinsson, skiptastjóri þrotabús Wow air, segir í samtali við Vísi beint eftir uppkvaðningu dómana að honum sýnist að Landsréttur hafi beitt annarri túlkun á 134. grein laga um gjaldþrotaskipti og fleira en héraðsdómur.

Greinin mælir meðal annars fyrir um að rifta megi greiðslu ef greidd var fjárhæð sem hefur skert greiðslugetu þrotamannsins verulega. Í héraði var fallist á að sú hefði verið raunin á þeim tímapunkti þegar umræddar greiðslur voru inntar af hendi. Sveinn Andri segir að Landsréttur hafi aftur á móti litið til lengra tímabils og ekki talið greiðslurnar hafa skert greiðslugetu Wow air.

Þá segir Sveinn Andri að hann muni óska eftir áfrýjunarleyfi til Hæstaréttar og hann telji líklegt að Hæstiréttur muni vilja eiga lokaorðið í málinu.

Ellefu mál í heildina

Þann 8. nóvember gengu dómar í málunum í Héraðsdómi Reykjavíkur ásamt dómum í fjórum öðrum málum. Þeim fjórum var ekki áfrýjað. Vísir fjallaði ítarlega um dómana í héraði í fréttinni hér að neðan:

Málin voru höfðuð af þrotabúi Wow air á hendur fjölda kröfuhafa Wow air, Skúla, Liv Bergþórsdóttur, stjórnarformanni Wow air, og stjórnarmönnunum Helgu Hlín Hákonardóttur og Davíð Mássyni. Þrjú síðastnefndu voru sakaukastefndu og fimm vátryggingafélögum var stefnt til réttargæslu.

Unnu að björgun og fengu svigrúm

Kröfuhöfum Wow air var stefnt til riftunar greiðslna sem þeim bárust skömmu fyrir gjaldþrot Wow air árið 2019 og Skúla og félögum til óskiptrar greiðslu skaðabóta vegna þess tjóns sem þeir voru sagðir hafa bakað þrotabúinu.

Í dómum héraðsdóms sagði var ekki talið að stjórnendur Wow air hefðu bakað sér skaðabótaskyldu með saknæmri háttsemi í aðdraganda gjaldþrotsins. Í dómunum sagði að bótaábyrgð yrði aðeins felld á stjórnendur yrði komist að þeirri niðurstöðu að þeir hefðu valdið tjóni af ásetningi eða stórkostlegu gáleysi.

Dómurinn hefði talið að með vísan til aðstæðna og málsatvika í aðdraganda gjaldþrotsins að við sakarmat beri að veita stjórninni nokkurt svigrúm í tilraunum sínum til að bjarga rekstri félagsins. Taki þannig mælikvarði við mat á því hvort háttsemi stjórnar sé saknæm mið af slíku svigrúmi.