Bára nýr fjár­mála­stjóri Sam­herja

Í tilkynningu segir að samhliða ráðningunni hafi fjármálasvið og upplýsingatæknisvið Samherja Íslands ehf. verið sameinuð undir stjórn Finnboga Reynissonar sem verður fjármálastjóri félagsins. Þá mun Jón Rafn Ragnarsson einbeita sér að fjármálastjórn Samherja fiskeldis ehf. en hann hefur verið fjármálastjóri samstæðu Samherja frá árinu 2016.

Samherji hf. er móðurfélag samstæðu Samherja en þar undir eru dótturfélögin Samherji Ísland ehf., sem sér um veiðar og vinnslu, sölufélagið Ice Fresh Seafood ehf. og Samherji fiskeldi ehf., sem stundar fiskeldi á landi.

„Þann tíma sem ég hef starfað hjá Samherja hef ég sinnt fjölbreyttum og krefjandi verkefnum. Þar má nefna fjármögnun á ólíkum sviðum starfseminnar og umbreytingar á fjármálasviði. Þannig hef ég fengið tækifæri til að taka þátt í þróun og uppbyggingu félagsins í gegnum árin. Ég er þakklát forstjóra Samherja fyrir það traust sem mér er sýnt með ráðningu í starf fjármálastjóra og er spennt að taka við nýrri stöðu,“ segir Bára Eyfjörð Jónsdóttir í tilkynningunni.

Ráðningin rökrétt skref

Þar kemur einnig fram að Bára er með B.Sc.-gráðu í sjávarútvegsfræði frá Háskólanum á Akureyri. Hún hefur unnið allan sinn starfsferil hjá Samherja en hún hóf störf samhliða háskólanámi árið 2006 og var síðan ráðin fjárreiðustjóri Samherja hf. á árinu 2007 að lokinni útskrift. Hún hefur verið fjármálastjóri Samherja Íslands ehf. frá ágúst 2025.

Baldvin Þorsteinsson forstjóri Samherja hf. segir að ráðning Báru hafi verið rökrétt skref þegar það lá fyrir að breytingar yrðu á framkvæmdastjórn.

„Bára hefur verið lykilstarfsmaður hjá Samherja um margra ára skeið. Hún er öllum hnútum kunnug í rekstrinum og þekkir vel fjármál, innviði og ólík svið. Ég hlakka til að starfa með henni að áframhaldandi uppbyggingu félagsins,“ segir Baldvin.