Guð­rún Brá í góðri stöðu eftir einn besta hringinn á ferlinum

Guðrún lék hringinn í gær á 69 höggum, þremur undir pari vallarins. Hún fékk þar þrjá fugla og tapaði ekki höggi.

Í dag bætti hún svo um betur og fór hringinn á aðeins 66 höggum, sex undir pari vallarins og á þessum átján holum tók Guðrún aðeins 27 pútt.

Hún fékk sjö fugla og einn skolla á þessum magnaða hring og kom sér upp í sjötta sæti mótsins fyrir lokahringinn á morgun.

Þetta er fjórða og síðasta mót Guðrúnar á Sunshine mótaröðinni í ár, en hún hefur leikið gott golf í Suður-Afríku að undanförnu. Með öðrum góðum hring á morgun gæti hún náð aftur á verðlaunapall eins og á fyrsta móti tímabilsins þar sem Guðrún varð í 3. sæti.

Andrea Bergsdóttir og Hulda Clara Gestsdóttir voru einnig á meðal keppenda mótsins en náðu ekki í gegnum niðurskurð. Hulda Clara lék mótið á einu höggi undir pari og Andrea lauk leik á þremur höggum yfir pari.