Handbolti

„Ekki endi­lega það sem maður vildi“

Valur Páll Eiríksson skrifar
Stiven er klár í slaginn og ætlar að sýna sig og sanna í komandi leikjum við Svía.
Stiven er klár í slaginn og ætlar að sýna sig og sanna í komandi leikjum við Svía. Vísir/Bjarni

„Ég er helvíti illa sofinn. Ég flaug yfir í nótt og lenti um klukkan fjögur,“ sagði Stiven Tobar Valencia þegar Sýn bar að garði á fyrstu æfingu karlalandsliðsins á mánudagsmorgun fyrir komandi leiki við Svía hér heima.

„Það er bara mikil tilhlökkun. Það er alltaf gaman koma heim og hitta strákana. Það er búið að vera mikið álag í félagsliðinu en gott að koma heim og anda aðeins,“ segir Stiven.

Klippa: Stiven smá þreyttur en klár í slaginn

Stiven var utan leikmannahóps Íslands sem fór á EM í janúar eftir að hafa farið á EM 2024 og HM 2025. Bjarki Már Elísson og Orri Freyr Þorkelsson voru valdir fram yfir hann í vinstri hornamannastöðuna fyrir nýliðið mót og eðlilega voru vonbrigði að fara ekki með á mótið.

„Þetta var ekki endilega það sem maður vildi en maður studdi strákana. Ég var mjög ánægður með þá og studdi við bakið á þeim alla leið og í hverju einasta skrefi sem þeir tóku á þessu móti,“ segir Stiven.

En er þá ekki kjörið tækifæri núna í leikjunum við Svía að vinna sér aftur inn sæti í hópnum?

„Jú, klárlega,“ segir Stiven sem tekur sæti Bjarka Más í hópnum fyrir komandi leiki vegna meiðsla hans. Bjarki æfir með liðinu en mun ekki taka þátt í leikjunum tveimur.

Varðandi hvað menn vilji fá út úr komandi leikjum segir Stiven:

„Þetta eru tveir mjög erfiðir leikir við Svíþjóð og við þurfum að spila mjög vel á móti þeim til að ná þessum tveimur sigrum. Við ætlum að ná eins miklu og við getum út úr þessum tveimur leikjum.“

Ísland mætir Svíþjóð að Hlíðarenda klukkan 19:30 annað kvöld og svo aftur í Kaplakrika klukkan 17:00 á laugardaginn kemur.

Viðtalið má sjá í spilaranum að ofan.




Fleiri fréttir

Sjá meira


×