Þórður Már til Faxaflóahafna

Í fréttatilkynningu þess efnis segir að Þórður komi til Faxaflóahafna frá umhverfis- og skipulagssviði Reykjavíkurborgar, þar sem hann hafi starfað sem verkefnistjóri deiliskipulagsáætlana síðastliðin fjögur ár. Þar áður hafi hann starfað sem skipulagsfulltrúi í samlagi fimm sveitarfélaga á Vestfjörðum; Dalabyggð, Strandabyggð, Reykhólahreppi, Kaldrananeshreppi og Árneshreppi.

„Ég hef tekist á við fjölbreytt og krefjandi verkefni á mínum ferli í skipulagsmálum. Í starfi mínu hjá Reykjavíkurborg sá ég frá fyrstu hendi hversu lykilhlutverki eining á borð við Faxaflóahafnir gegnir, ekki aðeins í daglegri starfsemi borgarinnar heldur einnig með tilliti til framtíðarþróunar hennar. Hlutverk hafnanna nær langt út fyrir borgarmörkin, enda er starfsemi Faxaflóahafna á landsbyggðinni jafnframt mikilvægur þáttur í byggðaþróun, atvinnulífi og samspili skipulags, samgangna og hafnarstarfsemi,“ er haft eftir Þórði Már.

Hann sé með BS-gráðu í landfræði og meistaragráðu í skipulagsfræði.

Þá segir að Faxaflóahafnir reki umfangsmestu hafnir landsins á starfsvæðum sínum í Reykjavík, Akranesi, á Grundartanga og í Borgarnesi. Félagið tengi stærsta markaðs- og atvinnusvæði Íslands við umheiminn og miðin með öruggum, grænum og skilvirkum höfnum. Rúmlega 80 manns starfi hjá fyrirtækinu, sem leggi áherslu á að vera leiðandi í umhverfis- og öryggismálum og sé í vegferð að þróa snjallar og sjálfbærar hafnir framtíðarinnar.