Seðla­bankinn heldur stýri­vöxtunum ó­breyttum

Greint er frá ákvörðun peningastefnunefndar Seðlabankans í yfirlýsingu sem birt var klukkan 8:30. Greiningaraðilar höfðu ýmist spáð því að nefndin myndi halda stýrivöxtunum óbreyttum eða þá hækka þá um 25 punkta.

Í yfirlýsingunni segir að verðbólga mælist nú 5,2 prósent og hafi aukist á ný. 

„Þótt hækkun verðlags í janúar megi að miklu leyti rekja til breyttrar gjaldtöku hins opinbera af nýjum bifreiðum eru verðhækkanir á tiltölulega breiðum grunni. Undirliggjandi verðbólguþrýstingur er því áfram þrálátur þótt hægt hafi á efnahagsumsvifum og skýr merki séu um kólnun á vinnumarkaði.

Samkvæmt nýbirtri spá Seðlabankans er spennan í þjóðarbúinu horfin, útlit fyrir tiltölulega hægan hagvöxt og að verðbólga hjaðni þegar líður á árið. Þrátt fyrir tímabundna aukningu verðbólgu í byrjun árs hafa verðbólguhorfur til lengri tíma lítið breyst. Óvissa er þó mikil enda launahækkanir enn töluverðar og verðbólguvæntingar mælast áfram yfir markmiði.

Af þessum sökum telur peningastefnunefnd rétt að halda vöxtum bankans óbreyttum. Frekari ákvarðanir um lækkun vaxta bankans eru háðar því að skýrar vísbendingar komi fram um að verðbólga sé að hjaðna í 2,5% markmið bankans.

Mótun peningastefnunnar næstu misseri mun sem fyrr ráðast af þróun efnahagsumsvifa, verðbólgu og verðbólguvæntinga,“ segir í yfirlýsingunni.

Næsti vaxtaákvörðunardagur peningastefnunefndar er 18. mars næstkomandi.

Vefútsending klukkan 9:30

Blaðamannafundur hefst klukkan 9:30 þar sem gerð verður grein fyrir yfirlýsingu peningastefnunefndar. Þar munu Ásgeir Jónsson, seðlabankastjóri og formaður peningastefnunefndar, Þórarinn G. Pétursson, varaseðlabankastjóri peningastefnu og Karen Áslaug Vignisdóttir, aðalhagfræðingur og framkvæmdastjóri sviðs hagfræði- og peningastefnu gera grein fyrir yfirlýsingu peningastefnunefndar og kynna efni Peningamála.

Hægt verður að fylgjast með fundinum í spilaranum að neðan.