Sara var lengi lásskjámynd Ey­glóar en nú er Ey­gló á símanum hjá Söru

Sara skrifaði pistil á miðla sína þar sem hún rifjaði upp hvernig hún heillaðist af ólympískum lyftingum og nefndi að þótt hún hafi verið fyrsta íslenska konan til að lyfta tvö hundruð kílóum þá væri Evrópumeistarinn okkar kominn langt yfir það.

Sara skrifaði pistil sinn á ensku.

Breytti hugarfari mínu algjörlega

„Þegar ég kynntist CrossFit varð ég ástfangin af ólympískum lyftingum. Það breytti hugarfari mínu algjörlega, úr því að skammast mín fyrir að vera sterk stelpa yfir í að faðma styrkinn að fullu,“ skrifaði Sara.

„Ég setti mér stórt markmið: að verða fyrsta íslenska konan til að lyfta yfir tvö hundruð kíló samanlagt og það tókst. Það er ótrúlegt að hugsa til þess að þetta var fyrir níu árum, mér finnst eins og það hafi gerst í gær. Síðan þá hafa ólympískar lyftingar á Íslandi tekið gríðarlegum framförum,“ skrifaði Sara.

„Í dag er núverandi Evrópumeistari í kvennaflokki íslensk, Eygló Fanndal Sturludóttir. Og já, samanlögð lyfta hennar er langt yfir tvö hundruð kílóum,“ skrifaði Sara.

Ótrúlega stolt af því hvernig íþróttin hefur þróast

„Ég er ótrúlega stolt af því hvernig íþróttin hefur þróast á Íslandi, sérstaklega meðal kvenna, og enn stoltari af því að sjá hversu margar stelpur faðma nú styrk sinn og eru stoltar af honum,“ skrifaði Sara.

Eygló Fanndal sjálf sá færsluna og setti inn skemmtilega athugasemd.

„Stærsta fyrirmyndin mín þegar ég var að byrja í íþróttinni og lock screenið [lásskjámynd] mitt í vandræðalega langan tíma,“ skrifaði Eygló.

Sara svaraði henni líka á móti. „Eygló Fanndal, þú ert lockscreenið mitt núna,“ skrifaði Sara. Já, fyrirmyndin þín er nú með þig sem fyrirmynd. Eitthvað til að fá fólk til að hlýna um hjartaræturnar.