Leynast öflugar ís­lenskar skyttur ein­hvers staðar?

Einar Jónsson og Rúnar Kárason mættu til Stefáns Árna Pálssonar og gerðu upp tapið gegn Króatíu í leiknum um bronsverðlaunin á EM.

„Við höfum verið að tala um skort á fjölbreytileika í sóknarleik íslenska landsliðsins. Þorsteinn Leó [Gunnarsson] átti kannski að koma með eitthvað framlag inn í þetta landslið. Því miður meiddist hann. Hann er svona skytta. Eru fleiri leikmenn að koma inn upp sem væru kannski svona, eru aðeins hærri og eru skyttur?“ spurði Stefán Árni Pálsson.

Þurfum klárlega mann eins og hann

„Síðustu ár höfum við ekkert verið að fá upp allt of mikið upp af akkúrat þessum týpum en við höfum verið að gera það ágætlega án þeirra. En ég held klárlega að við þurfum að fá mann eins og hann inn í þetta. Við þurfum að fá leikmenn sem geta skotið utan af velli,“ sagði Einar Jónsson.

„Við erum með leikmenn sem eru virkilega góðir í gegnumbrotum. Við erum með leikmenn sem eru fínir í svona skotum af stuttu færi. Þá þurfum við Þorstein Leó en ég vil líka nefna Reyni [Stefánsson] því þar er gaur sem getur skotið af níu til tíu metrum. Hann er nú kominn á góðan stað núna, hjá Melsngen í Þýskalandi, en hann þarf náttúrulega bara að sýna og sanna að hann eigi heima þarna. Þetta eru svona í fljótu bragði þeir leikmenn sem ég sé að eru svona einhverjir skotmenn,“ sagði Einar.

Vantar ekkert ofboðslega mikið í þetta lið

„Það vantar ekkert ofboðslega mikið í þetta lið til þess að þetta verði heimsklassa, við erum heimsklassalið, en til þess að þetta kannski stígi næsta skref að mínu mati,“ sagði Einar og nefnir sérstaklega mörk með langskotum. Af þeim liðum sem spiluðu um verðlaun á Evrópumótinu í ár var íslenska landsliðið að fá langfæst mörk með langskotum á mótinu eða aðeins 34 á meðan Króatar skoruðu 71 langskotmark, Danir voru með 62 mörk fyrir utan og Þjóðverjar skoruðu heil 97 mörk með skotum af níu metrum.

„Við erum það lið sem hefur skorað langfæst mörk utan af velli. Við erum að erfiða miklu meira heldur en önnur lið. Maður horfir á úrslitaleikinn í dag. Þú ert bara með Þjóðverja og þú ert með Danina. Þau eru alltaf með einhverja leikmenn sem bara eru að negla á markið af níu metrum. Við erum ekki þarna,“ sagði Einar.

Stærsti þátturinn ef við ætlum upp á næsta stig

„Þetta er einn af þessum þáttum sem ég tel reyndar vera stærsta þáttinn, ef við ætlum upp á næsta getustig. Ef við ætlum að keppa við þessar þjóðir þá verðum við að fá fjölbreyttari sóknarleik, sem meðal annars býður upp á það að við séum með leikmenn sem geta skotið á markið,“ sagði Einar.

„Að liðin fari að rjúka aðeins út í okkar og þá er náttúrulega búið að opnast fyrir Gísla [Þorgeir Kristjánsson],“ skaut Rúnar Kárason inn í.

Enginn að biðja um sextíu mínútur

„Það er enginn að tala um það að Þorsteinn Leó þurfi að spila sextíu mínútur. Við erum að tala um að það þurfi að dreifa álaginu og geta breytt aðeins til þannig við séum örlítið fjölbreyttari,“ sagði Einar.

Það má hlusta á meira um þetta og annað í kringum íslenska landsliðið í Besta sætinu þar sem menn voru að gera upp lokaleikinn á móti Króatíu sem og allt mótið. Allur þátturinn er aðgengilegur hér fyrir neðan sem og á öllum hlaðvarpssveitum.