Handbolti

Gísli gagn­rýnir fyrir­komu­lagið á EM

Ingvi Þór Sæmundsson skrifar
Gísli Þorgeir Kristjánsson á ferðinni í leiknum gegn Svíþjóð sem Ísland vann örugglega, 35-27.
Gísli Þorgeir Kristjánsson á ferðinni í leiknum gegn Svíþjóð sem Ísland vann örugglega, 35-27. vísir/vilhelm

Ekki eru allir sáttir með fyrirkomulagið á Evrópumótinu í handbolta. Þeirra á meðal er Gísli Þorgeir Kristjánsson, leikstjórnandi íslenska landsliðsins.

Liðin í milliriðli I á EM spila alltaf annan hvern dag á meðan liðin í milliriðli II, sem Ísland er í, spila síðustu tvo leiki sína á þriðjudag og miðvikudag. 

Þá þurfa þrjú efstu liðin í milliriðli II að ferðast frá Malmö til Herning á fimmtudaginn. Á föstudaginn verður svo leikið til undanúrslita og um 5. sætið. Álagið á liðin í milliriðli II er því umtalsvert meira en á liðin í milliriðli I.

„Þetta er frekar skrítið fyrir okkur í þessum milliriðli. Þetta er eins fyrir okkur öll en þegar við berum saman er skrítið að við þurfum að spila tvo daga í röð á meðan hinn riðillinn fær frídag. En svona er þetta bara,“ sagði Gísli í samtali við TV 2 í Danmörku er hann var spurður út í fyrirkomulagið á EM. Hann segir að þetta gæti haft áhrif í stóru leikjunum á föstudaginn.

Getum ekki breytt þessu

„Þúsund prósent örugglega. Því liðin úr þessum riðli munu þjást. Leikir tvo daga í röð og svo þarf maður að ferðast til Herning. Ég held að það taki fjóra til fimm tíma og það er eftir leik þar sem maður hefur yfirleitt sofið illa. Svo er bara einn leikur fyrir úrslitaleikinn. En þetta er eins og það er. Ég ætla ekki að kvarta of mikið og við getum ekki breytt þessu.“

Chema Rodríguez, þjálfari Ungverjalands, og Denis Spoljaric, aðstoðarþjálfari Króatíu, taka í sama streng og Gísli. En Tobias Karlsson, liðsstjóri Svíþjóðar, og Arnór Atlason, aðstoðarþjálfari Íslands, velta sér lítið upp úr þessum aðstæðum.

„Það er víst alltaf lið sem heldur mótið sem fær hvíldardag. Þetta er eins og það er. Þetta er ekkert. Við fengum auka dag eftir riðlakeppnina okkar svo það er ekkert í þessu,“ sagði Arnór.

Fyrirkomulagið lá fyrir

Í svari EHF, Handknattleikssambands Evrópu, til TV 2 segir að þátttökuliðin á EM hafi vitað hvernig fyrirkomulagið á mótinu yrði með löngum fyrirvara. 

Í svarinu segir einnig að riðlakeppnin í Malmö hófst síðar en aðrir riðlar, 17. janúar, og liðin sem komu frá Osló og Kristianstad, eins og Ísland, hafi fengið auka dag áður en keppni í milliriðli II hófst.

Ísland mætir Sviss í Malmö klukkan 14:30 á morgun.

EM karla í handbolta 2026 Landslið karla í handbolta

Tengdar fréttir

„Fókusinn er upp á tíu hjá okkur“

„Maður lagðist glaður á koddann í gær með tvö stig og frábæran leik,“ segir varnarjaxlinn Ýmir Örn Gíslason afar sáttur með leikinn gegn Svíum í gær.

Stærð sigurs Ís­lands gegn Svíum veki upp spurningar

Drazen Pinevic, blaðamaður króatíska miðilsins Sportske Novotski, ritar pistil í dag þar sem hann er ansi harðorður í garð sænska landsliðsins eftir átta marka tap liðsins gegn Íslandi á EM í handbolta í gær. 

Ótrú­leg saga Viggós rifjuð upp í er­lendum miðlum

Viggó Kristjánsson var að öðrum ólöstuðum maður leiksins í mögnuðum sigri Íslands gegn Svíþjóð í gær, á EM í handbolta, og af því tilefni hefur verið rifjað upp að á sínum tíma var Viggó ekki í handbolta heldur fótboltamaður hjá einu besta liði Íslands.

Heilbrigðisráðherra lætur óvin Íslands heyra það

„Éttu þetta Andreas Stockenberg,“ skrifar Alma Möller heilbrigðisráðherra á Facebook og deilir í leiðinni grein Handkastsins þar sem farið er yfir það þegar sænski þjálfarinn Stockenberg fór yfir dapran leikstíl íslenska landsliðsins á X-inu, að hans mati.

Dregur til baka um­mæli sín um Gísla Þor­geir

Sér­fræðingar Besta sætisins héldu vart vatni yfir frammistöðu Gísla Þor­geirs Kristjáns­sonar í átta marka sigri Ís­lands á Svíþjóð á EM í hand­bolta í gær. Menn tóku hatt sinn ofan, átu sokk, en um­fram allt dáðust að Gísla Þor­geiri og því hvernig hann hefur tekið af skarið sem leið­togi innan vallar.

Óvinur Íslands: „Aldrei stríða heilu landi“

Sænski handboltaþjálfarinn Andreas Stockenberg hefur átt í vök að verjast á samfélagsmiðlum eftir að hann hraunaði yfir íslenska landsliðið sem svo valtaði yfir það sænska á EM í gær.

„Svo kemur Ómar Ingi og fer að spila eins og Viggó“

Viggó Kristjánsson var öðrum fremur maður leiksins í stórsigrinum á Svíum á EM í handbolta í gærkvöldi og með magnaðri innkomu hans kviknaði heldur betur á hægri vængnum hjá íslenska landsliðinu. Örvhentu leikmennirnir í Besta sætinu voru líka ánægðir með þessa innkomu Viggós og líka hvaða áhrif það hafði á Ómar Inga Magnússon.

Mest lesið


Fleiri fréttir

Sjá meira


×

Mest lesið