Töl­fræðin á móti Ítalíu: Þrír í ís­lenska liðinu með yfir 9,55 af tíu í sóknareinkunn

Íslensku strákarnir sýndu sínar bestu hliðar í sóknarleiknum og hreinlega sundurspiluðu ítölsku vörnina hvað eftir annað.

Eftir að hafa klikkað fimm af fyrstu níu skotunum sínum í leiknum skiptu strákarnir í gírinn og nýttu sautján af síðustu átján skotum sínum í hálfleiknum. Það gerir ótrúlega 94 prósenta nýtingu og ofan á það tapaði liðið aðeins tveimur boltum í fyrri hálfleiknum.

Janus Daði Smárason átti frábæra innkomu af bekknum og skilaði fimm mörkum og fjórum stoðsendingum í hálfleiknum þrátt fyrir að spila ekki stóran hluta hans.

Vörnin þvingaði hvern tapaða boltann á fætur öðrum og þremur mismunandi leikmönnum íslenska liðsins tókst að fiska ruðning á Ítala þegar íslenska liðið keyrði yfir Ítalana. Eftir þessa mögnuðu frammistöðu í fyrri hálfleiknum var seinni hálfleikurinn nánast formsatriði enda sigldu strákarnir öruggum sigri í höfn.

Janus Daði fór vissulega á kostum en það gerðu líka Gísli Þorgeir Kristjánsson og Ómar Ingi Magnússon sem lásu ítölsku vörnina eins og opna bók. Allir þessir þrír voru með sóknareinkunn hjá HB Statz yfir 9,55 sem sýnir vel hvers konar sóknarleik íslenska liðið var að spila.

Viktor Gísli Hallgrímsson þurfti engan stórleik en það hans gerði betur en allt var að verja vítaskot. Viktor varði þrjú víti og auk þess skutu Ítalir yfir úr einu í viðbót.

Það gekk flest upp hjá flestum en það mun örugglega reyna miklu meira á strákana okkar í næstu leikjum en það er samt ekkert grín að stoppa íslensku sóknina í svona ham.

Hér fyrir neðan má sjá toppa íslenska liðsins í tölfræðinni.