Hetjuleg bar­átta dugði ekki gegn heimsmeisturunum

Íslenska liðið komst í úrslitaleikinn á móti heimsmeisturum Þjóðverja en varð að sætta sig við þriggja marka tap, 31-28.

Íslensku strákarnir hófu leikinn af miklum krafti og höfðu sex marka forskot þegar fyrri hálfleikurinn var hálfnaður. Staðan í hálfleik var 17-16, okkar mönnum í vil.

Þjóðverjar hófu seinni hálfleikinn mun betur og lögðu grunninn að sínum sigri. Okkar menn gerðu gott áhlaup í lokin en því miður var það ekki nóg.

FH-ingurinn Brynjar Narfi Arndal var markahæstur með níu mörk en Valsmaðurinn Bjarki Snorrason skoraði fjögur mörk eins og ÍR-ingurinn Patrekur Smári Arnarsson.

Ásgeir Örn Hallgrímsson og Andri Sigfússon þjálfa íslenska liðið.

Íslenska liðið vann sterkt lið Portúgal í undanúrslitaleiknum. 

Bæði liðin höfðu unnið alla leiki sína á mótinu fyrir úrslitaleikinn. Liðin höfðu líka tvisvar sinnum mæst áður; á æfingamóti í Færeyjum fyrir hálfu ári síðan þar sem Þjóðverjar höfðu betur. Ísland bætti upp fyrir það með góðum sigri á Ólympíuhátíð Evrópuæskunnar í sumar. Þjóðverjar eru ríkjandi heimsmeistarar í þessum aldursflokki.