„Þetta var af­leitt, ég segi bara af­sakið“

KA skoraði ekki fyrr en eftir 13 mínútur í síðari hálfleik sem hleypti gestunum átta mörkum yfir og leikurinn í raun langt kominn þar með. Andri fór yfir þennan kafla í upphafi viðtalsins.

„Við lentum bara á vegg sóknarlega, það var erfitt að finna réttu stöðurnar og við vorum alltof hægir og hikandi í okkar aðgerðum og leikurinn fer illa á þeim kafla, það er bara þannig, en að sama skapi þá vorum við líka í fyrri hálfleik í basli með sóknina og þar að auki að klúðra færum þannig við vorum bara í basli með að skora í dag.“

KA skoraði 38 mörk í síðasta leik, í 42-38 tapi gegn Haukum og því mikil sveifla á sóknarleiknum á einni viku.

„Við ætluðum að vinna þennan leik í dag á vörn en það var hins vegar þannig að við erum of hikandi eins og ég sagði og það er bara eitthvað sem við verðum að taka og vinna í, því sem betur fer er stutt í næsta leik, svona er þetta stundum. Handbolti er stemningsíþrótt en við fundum ekki taktinn sem við vildum og þeir efldust og unnu sanngjarnan sigur.“

KA minnkaði muninn í fjögur mörk eftir að hafa ekki skorað í þrettán mínútur og virtist sóknarleikurinn lagast eftir að Bjarni Ófeigur fór af velli en hann aðeins með eitt mark úr níu skotum. En er Andri sammála því að hann hafi þurft að fara af velli svo aðrir leikmenn myndu sýna frumkvæði?

„Já já, það var alveg rétt, við reyndum að finna lausnir allan leikinn. Sóknarlega að skipta mönnum og líka að fara í sjö á sex og það var allskonar sem við vorum að prófa og það er bara þannig að í handbolta þarf maður að þora og sækja á markið og þora að prófa en það bara gekk ekki hjá okkur sem lið í dag og það er bara staðan.“

KA fær aftur heimaleik í næstu umferð, þegar HK kemur í heimsókn á mánudaginn kemur.

„Bara sem betur fer er stutt aftur í að við getum gert eitthvað gott fyrir fólkið okkar því að þetta var afleitt, ég segi bara afsakið við okkar flotta fólk sem fjölmennti í dag. Við bætum fyrir þetta á mánudaginn, það er klárt mál“, sagði Andri að lokum.