Skýrsla Ágústs: Brot­hætt snilld sem þarf að byggja upp

Stemningin var sannarlega til staðar í kvöld og þegar vel gekk var hrein unun að horfa á íslenska liðið spila en í seinni hálfleik hrundi allt saman. 

Liðið brást illa við mótlætinu og lét allt fara í taugarnar á sér, meira að segja þjálfarinn gat ekki hamið sig og fékk rautt spjald áður en leik lauk.

Vafasamir dómar féllu vissulega en þær spænsku virtust líka bara vera margfalt reynslumeiri og klókari í sínum aðgerðum.

Áður en allt fór til andskotans sást hins vegar að þetta lið á fullan rétt því að vera þjóð meðal þjóða í milliriðlinum og ef rétt er haldið á spöðunum gæti það náð enn lengra.

Yngri leikmenn liðsins hafa fengið dýrmæta reynslu á þessu móti og leikurinn í kvöld var engin undantekning. Reynslumeiri leikmenn liðsins hafa hins vegar sannað mikilvægi sitt.

Thea Imani Sturludóttir var til dæmis besti leikmaður Íslands í kvöld, en er því miður enn að jafna sig af meiðslum síðan í sumar og ekki í nógu góðu standi til að spila stanslaust.

Yfirlýst markmið þjálfarans og liðsins er líka að leyfa sem flestum að spila og fá reynslu af stórmóti.

Framfaraskref hafa verið stigin á þessu móti og leikurinn gegn Spáni í kvöld mun vonandi nýtast liðinu til lengri tíma, þó svekkelsið sé mikið að hafa misst þetta svona úr böndunum.

Snilldin er til staðar en svona brothætt lið þarf að bæta margt á næstu árum. 

Líkamlegi þátturinn er mikilvægur, stelpurnar okkar mættu alveg vera aðeins massaðari til að eiga meiri séns í sterkari lið, en hugarfarið skiptir mestu máli og þann þátt þarf að byggja mun betur upp ef ekki á illa að fara eins og í kvöld.

Nú er neðsta sætið í riðlinum staðfest í eigu Íslands en einn leikur er eftir af HM, gegn frænkum okkar frá Færeyjum sem búa einnig yfir ungu og efnilegu liði. Þar munu engar afsakanir gilda.