Viðskipti innlent

Vonar að frestun fundarins marki stefnu­breytingu

Hallgerður Kolbrún E. Jónsdóttir skrifar
Elkem á Íslandi flytur mikið magn kísilmálms til Evrópu.
Elkem á Íslandi flytur mikið magn kísilmálms til Evrópu. Vísir/Vilhelm

Forstjóri Elkem á Íslandi segir mikla óvissu ríkja um verndarráðstafanir Evrópusambandsins á íslenskan og norskan kísilmálm og lítið sé hægt að geta sér til um ákvörðun sambandsins. Raungerist ráðstafanirnar hafi hún mestar áhyggjur af getu til að bregðast við áföllum á öðrum mörkuðum.

Fulltrúar Evrópusambandsins gerðu íslenskum og norskum stjórnvöldum það ljóst í síðustu viku að þau verði ekki undanþegin verndarráðstöfunum sambandsins á kísilmálm. 

Ákvörðunin er ekki endanleg en samninganefndir bíða eftir mikilvægum fundi þar sem taka á endanlega ákvörðun um málið. Fundurinn átti að fara fram á föstudag en var þá frestað og greindi Ríkisútvarpið frá því í morgun að aftur væri búið að fresta fundinum til morguns.

Halda að sér höndum í óvissuástandi

Álfheiður Ágústsdóttir forstjóri Elkem á Íslandi bindur vonir við að frestun fundarins sé til marks um að tilraunir norskra og íslenskra stjórnvalda til að hnekkja ákvörðuninni hafi borið árangur.

„Ég veit að utanríkisþjónustan bæði hér og í Noregi er að leggja sig alla fram og auðvitað vonar maður að þetta sé til marks um það en það er í raun ekkert nema getgátur,“ segir Álfheiður. 

Álfheiður Ágústsdóttir, forstjóri Elkem á Íslandi.elkem

Elkem tilkynnti um það í síðasta mánuði að draga þurfi úr framleiðslu, meðal annars vegna óvissu á markaði. Stefnt er að því að það komi til framkvæmda í byrjun desember.

„Auðvitað tengist það þessari óvissu og aðilar á markaði halda að sér höndum í miklu óvissuástandi. Það kannski skýrir hvað þetta er óþægilegt en við erum að horfa núna á 3. desember og sjáum ekki endilega neitt sem ætti að breyta þeirri ákvörðun.“

Mestar áhyggjur af viðbragðsgetu annars staðar

Fyrirtæki á Íslandi flytja út kísilafurðir fyrir um fjörutíu milljarða króna að mati Samtaka Iðnaðarins. Álfheiður segir erfitt að geta til um áhrif verndartolla áður en þeir koma til framkvæmda. Sjá þurfi hvernig markaðurinn bregðist við.

„Elkem Ísland er að selja til allra þriggja stóru markaðanna. Við erum í Ameríku, Asíu og Evrópu. Það sem ég hef mestar áhyggjur af er geta okkar til að bregðast við áföllum á öðrum mörkuðum ef við erum komin með skorður inni í Evrópu,“ segir Álfheiður.

Stóriðja Evrópusambandið Skattar, tollar og gjöld EES-samningurinn Hvalfjarðarsveit Verndarráðstafanir ESB vegna kísilmálms

Tengdar fréttir

Segja ákvörðun um verndartolla enn slegið á frest

Atkvæðagreiðslu um verndartolla Evrópusambandsins á kísilmálm hefur enn verið frestað, að sögn Ríkisútvarpsins og norskra fjölmiðla. Endanlegri ákvörðun hafði verið frestað til dagsins í dag en nú er því haldið fram að hún fari fram á morgun.

Fundinum mikilvæga frestað

Fundi þar sem greiða átti atkvæði um tillögu framkvæmdastjórnar Evrópusambandsins um verndarráðstafanir vegna kísilmálms hefur verið frestað fram á mánudag. Samkvæmt tillögu framkvæmdastjórnarinnar verða íslenskir og norskir framleiðendur kísilmálms ekki undanþegnir verndarráðstöfununum.

Skýrt að verndarráðstafanir þurfi að ná yfir alla utan tollabandalags

Of snemmt er að segja til um hversu þungt höggið verður fyrir verksmiðju Elkem á Grundartanga samþykki ríki ESB tillögu framkvæmdastjórnarinnar um verndarráðstafanir. Sérfræðingur í Evrópurétti segir skýrt í regluverki Alþjóðaviðskiptastofnunarinnar að ef tollabandalög grípa til verndarráðstafana þá gildi þær um alla sem standa utan bandalagsins, ekki bara suma.



Mest lesið


Fleiri fréttir

Sjá meira


×

Mest lesið