Alvotech tekur dýfu eftir upp­gjör

Alvotech tilkynnti í gær að tekjur félagsins hefðu aukist milli ára og að stjórnendur hyggðust nýta sér nýja veltufjármögnun upp á 100 milljónir bandaríkjadala, jafngildi um 12,7 milljarða króna, til að fjármagna áframhaldandi rekstur. Félagið hefði átt 43 milljónir dala í lausu fé í lok september. Rannsóknar-, þróunar- og stjórnunarkostnaður einn og sér hefði numið um 216 milljónum dala á fyrstu níu mánuðum ársins.

Bandaríska lyfjaeftirlitið hafnaði nýverið umsókn Alvotech um markaðsleyfi í Bandaríkjunum fyrir nýja hliðstæðu við gigtarlyfið Simponi á grundvelli athugasemda sem gerðar voru við aðstöðu fyrirtækisins. Gengi hlutabréfa í Alvotech hrundi í kjölfarið en forstjóri þess segir það forgangsmál að bregðast við athugasemdum lyfjaeftirlitsins.

Eftir að tilkynnt var um höfnun umsóknarinnar fór gengi bréfa félagsins lægst niður í 636 krónur á hlut en hafði þangað til í morgun verið að rétta lítillega úr kútnum. Í lok dags í gær stóð gengið í 716 krónum. Í fyrstu viðskiptum í gær gengu bréf félagsins kaupum og sölum á 650 krónur en í einum viðskiptum fór gengið niður í 634 krónur. Þegar fréttin er skrifuð stendur gengið í 648 krónum.