Koma fólkinu heim með fimm­tán milljóna króna leigu­flugi

Líkt og ítarlega hefur verið fjallað um í dag var allri starfsemi flugfélagsins Play hætt í morgun. Fjögur hundruð missa vinnuna og ferðaáætlanir þúsunda eru í uppnámi. Þá sitja mörg hundruð farþegar félagsins fastir á erlendri grundu.

Meðal strandaglópanna eru áttatíu manns í tveimur árshátíðarferðum fyrirtækja á vegum ferðaskrifstofunnar Eventum Travel í Vilníus í Litáen. Einn þeirra setti sig í samband við Vísi og sagði að ferðaskrifstofan hefði reddað málunum og útvegað öllum far heim með leiguflugi í kvöld.

Ætluðu ekki að fljúga með Play framar

Sólveig Ragnheiður Gunnarsdóttir, framkvæmdastjóri fjármála og einn eigenda Eventum Travel, er í Vilníus ásamt hópunum tveimur. Í samtali við Vísi segir hún að ákveðið hafi verið strax að útvega leiguflugvél, enda miði ferðaskrifstofan að því að veita góða þjónustu. Hún hafi því verið í tölvunni í allan dag að fá tilboð í leiguflug og einu slíku hafi nú verið tekið.

Allur kostnaður við leiguflugið lendi á ferðaskrifstofunni en hann muni nema um fimmtán milljónum króna. Það sé ansi mikill kostnaður fyrir unga ferðaskrifstofu en ekkert sé við þessu að gera. Ferðaskrifstofur geti ekki tryggt sig fyrir gjaldþrotum flugfélaga. Þá komi yfirvöld ekki að því að bæta tjón ferðaskrifstofa.

„Við tryggjum okkar viðskiptavinum örugga ferð heim úr öllum okkar ferðum. Það kom ekki annað til greina í okkar huga en að leigja flugvél fyrir hópinn til að koma öllum til Íslands á tilsettum tíma. Félagið hefur verið starfandi í 3 ár en er í hröðum vexti. Að okkar mati er þetta dæmi um þá úrvals þjónustu sem við veitum þar sem við förum umfram væntingar til að tryggja gæði og upplifun okkar viðskiptavina,“ segir hún.

Voru hætt að bóka flug með Play

Sólveig segir að forsvarsmenn Eventum Travel hafi verið orðnir hræddir um að Play endaði í gjaldþroti og hafi því ákveðið í vor að hætta að bóka flugferðir með félaginu. Ferðin sem er nú á enda komin hafi verið sú síðasta sem ferðaskrifstofan átti bókaða með Play. Talið hafði verið nokkuð öruggt að leggja upp í ferðina í ljósi frétta af milljarða króna fjármögnun sem Play fékk nýverið.

Þá segir hún að ferðin hafi upphaflega átt að vera milli fimmtudags og sunnudags en Play hafi breytt ferðaplönunum. Af því hefði hlotist enn meiri kostnaður enda hafi þurft að útvega gistingu og breyta ráðstöfunum varðandi kvöldverði og þess háttar.

Vilja fylla vélina

Sem áður segir eru um áttatíu manns í Vilníus á vegum Eventum Travel en Sólveig segir að vélin sem var tekin á leigu sé af gerðinni Airbus A220 og því sé eitthvað um laus sæti með henni. Fimm Íslendingar hafi verið á hótelinu með hópunum tveimur og þeir ætli að nýta farið.

Þá bendir Sólveig Íslendingum og öðrum sem staddir eru í Vilníus og vilja slá sér með í för á að hafa samband við Eventum Travel í síma 697-4101.