Systurfélag ÞG verk­taka kaupir Arnarland

Frá þessu er greint í fréttatilkynningu á vef Arion banka. Þar segir að ákvörðunin sé tekin í kjölfar söluferlis sem byggði á útboðsfyrirkomulagi.

Arcus ehf., sem er í eigu Þorvaldar Gissurarsonar, er systurfélag byggingafyrirtækisins ÞG verktaka sem Þorvaldur stofnaði árið 1998. Arcus var stofnað árið 2004. 

„Gert er ráð fyrir glæsilegri íbúðabyggð í Arnarlandi þar sem heimilt er að reisa allt að 451 íbúðareiningu, samtals um 50.000 fermetra af íbúðarhúsnæði. Einnig er heimild fyrir allt að 36.000 fermetrum af atvinnuhúsnæði á svæðinu,“ segir í fréttatilkynningu.

Íbúar í nágrenninu hafa lýst yfir áhyggjum af hinni nýju byggð, sagt að hún taki ekki tillits til nágrennisins og komi til með að skerða útsýni íbúa Smárahverfisins í Kópavogi verulega. Almar Guðmundsson bæjarstjóri í Garðabæ sagðist í fyrra hafa þegar brugðist við ábendingum á fyrri stigum áætlunarinnar og að tekið yrði tillit til athugasemda íbúa.