Kjós­endur stjórnar­flokkanna „bitrir“ og í basli með sjálfs­myndina

Jón Pétur, sem tók sæti á þingi í fyrsta sinn í síðustu Alþingiskosningum, hefur vakið athygli fyrir mikla virkni á Facebook þar sem hann hefur skrifað fjölda pistla um hugðarefni sín. Nú eru það stuðningsmenn ríkisstjórnarflokkanna sem fá greiningu skólastjórans fyrrverandi.

„Hver ertu? Finnst þér erfitt þegar öðrum gengur vel, hvers vegna ekki ég? Borgar þú minna til samfélagsins en þú þiggur? Þeir sem eru vel stæðir hafa skarað eld að eigin köku með óeðlilegum hætti. Þeir sem þurfa tímabundna hjálp til sjálfshjálpar eiga að fá að rotna í helvíti enda aumingjar,“ segir Jón Pétur í pistlinum sem er með ljóðrænni hætti en flestir hans pistla.

Stundarvinsældir á kostnað almannahags?

„Ertu stjórnlyndur? Ertu til í að tala meira um óréttlæti en að gera raunverulega eitthvað í því. Skiptir þig meira máli að fólk haldi að þú sért góður og fáir mörg „like” á það en að þú gerir raunverulega eitthvað í því. Ertu til í stundarvinsældir þó að það kosti almannahag á endanum?

Þeir sem standa sig vel eiga að vinna töluverða nauðungarvinnu fyrir þà sem leggja sig minna fram.“

Hann veltir fyrir sér sýndargóðmennsku.

„Langar þig að sýnast vera góð manneskja á netinu og eltir því það sem er vinsælt hverju sinni því það er auðvelt að hneykslast á hinu. Ertu yfirborðskenndur og frasatamur? Finnst gott að elta það sem hljómar vel en nennir ekki alveg að kynna þér það? En myndir ALDREI viðurkenna það?“

Aðrir kjósendur vilji öllum gott og lyfta öllum

Hann spyr lesendur sína í framhaldinu hvort það kjósi Samfylkinguna, Viðreisn eða Flokk fólksins - sem fimmtíu prósent kjósenda gerðu í kosningunum í nóvember 2024.

„Þeir sem svara nei eru líklegir til að sökkva sér í málin, taka afstöðu út frá staðreyndum en ekki tilfinningum. Vilja ÖLLUM gott og lyfta öllum.

Þeir sem svara Já eru líklega bitrir. Einhver hefur komið illa fram við þà og þeir eru í vandræðum með sjálfsmynd sína,“ segir Jón Pétur.

„Þeim finnst þeir ekki metnir að verðleikum og að heimurinn sé ÓSANNGJARN. Að allt sé einhverjum ÖÐRUM að kenna og því nærtækt að kenna þeim um sem hafa það betur.“

Stjórnarþingmenn sagðir heiglar

Pistill Jóns Péturs vekur ýmis viðbrögð en kollegar hans í Sjálfstæðisflokknum, sem reglulega taka undir með honum í pistlum um önnur mál, eru ekki sjáanlegir á lækhnappinum eða umræðum. Heldur ekki þingmenn ríkisstjórnarflokkanna sem Jón Pétur kallar heigla í framhaldsfærslu og vísar til þess að ekki hafi farið fram nægilega mikil umræða á Alþingi um hækkun á veiðigjöldum sem hann vísar til sem 80 prósenta skattahækkunar. Hann er sannfærður um að afleiðingarnar verði mun verri en innkoma ríkissjóðs vegna hækkunarinnar.

Forseti Alþingis beitti 71. grein þingskaparlaga vegna langrar umræðu um veiðigjaldafrumvarpið sem þá var orðin lengsta umræða seinni tíma á Alþingi. Samtök fyrirtækja í sjávarútvegi og helstu útgerðarfélög landsins hafa varað verulega við hækkun veiðigjalda. 

Borið hefur á gagnrýni í garð þingmanna Sjálfstæðisflokksins vegna hagsmuna þeirra í sjávarútvegi. Varaformaður Sjálfstæðisflokksins hafnaði á dögunum að fjárhagslegir hagsmunir barna hans hefðu nokkuð með afstöðu hans til veiðigjalda að gera og svaraði þannig fyrir umfjöllun DV.

Fréttin hefur verið uppfærð.