Ís­lensku stelpurnar unnu silfrið á Norður­landa­mótinu

Íslensku stelpurnar unnu fjóra af fimm leikjum sínum á mótinu og urðu í öðru sæti á eftir Finnum sem voru með yfirburðalið.

Finnska liðið vann alla fimm leiki sína og það með 55 stigum að meðaltali í leik.

Íslenska liðið vann fimmtíu stiga sigur á Noregi, 102-52, í lokaleik sínum í dag.

Íslensku stelpurnar unnu fyrsta leikhlutann 38-22 og voru komnar 25 stigum yfir í hálfleik, 57-32.

Íslenska liðið hafði í raun nánast tryggt sér silfrið með eins stigs sigri í hörkuleik á móti Svíum fyrr á mótinu en Svíar urðu að sætta sig við bronsið.

Emil Barja, þjálfari Íslandsmeistara Hauka, er þjálfari stelpnanna en margar þeirra eru farnar að spila stórt hlutverk með meistaraflokkum sinna félaga.

Fyrirliðinn Kolbrún Maria Ármannsdóttir fór fyrir sínu liði á mótinu og varð stigahæst allra leikmanna liðsins. Kolbrún, sem spilar með Stjörnunni, skoraði 11 stig á móti Noregi í dag og með 17,2 stig að meðaltali í leik. Hún var valin í úrvalslið mótsins.

Þórsarinn úr Þorlákshöfn, Jóhanna Ýr Ágústsdóttir, skoraði 18 stig en hún setti niður fimm þrista.  Þórsarinn frá Akureyri, Emma Karólína Snæbjarnardóttir, skoraði 15 stig og KR-ingurinn Rebekka Rut Steingrímsdóttir var með tólf stig.