Stór­fyrir­tæki flýi borgina vegna skatta

Greint var frá því í gær að Félag atvinnurekenda hefði sent öllum sveitarfélögum í landinu erindi, þar sem hvatt er til þess að álagningarprósenta fasteignaskatts á atvinnuhúsnæði verði endurskoðuð til að mæta hækkunum fasteignamats, þannig að sköttum á atvinnuhúsnæði verði haldið óbreyttum á milli ára.

Í tilkynningu á vef félagsins sagði að á síðasta ári hefði álagður fasteignaskattur á atvinnuhúsnæði verið um 36,6 milljarðar króna. Þá hefði álagningin hækkað að raunvirði um fimmtíu prósent á einum áratug, þrátt fyrir lækkanir sumra sveitarfélaga á álagningarprósentu á tímabilinu. Hildur Björnsdóttir, oddviti Sjálfstæðismanna í borginni segir í samtali við Vísi að hún taki heilshugar undir með Félagi atvinnurekenda.

Vilja frysta tekjur af fasteignagjöldum

Hún segir að á næsta fundi borgarstjórnar muni borgarstjórnarflokkur Sjálfstæðisflokksins leggja fram eftirfarandi bókun, sem hafi raunar verið lögð fram á hverju ári kjörtímabilsins:

„Borgarstjórn samþykkir að lækka álagningarhlutfall fasteignaskatta á atvinnuhúsnæði og íbúðarhúsnæði við gerð fjárhagsáætlunar fyrir árið 2026, þannig að tekjur borgarsjóðs af álögðum fasteignagjöldum hækki ekki milli áranna 2025 og 2026. Með lækkuninni verði brugðist við hækkun fasteignamats sem kynnt var á dögunum en fasteignamat hefur tekið gríðarlegum hækkunum á kjörtímabilinu. Fjármála- og áhættustýringasviði verði falið að gera tillögur að nýju álagningarhlutföllum til samræmis við ofanritað.“

Óvinveitt kerfi leggi stein í götu fyrirtækja

Hildur segir að hækkun fasteignamats á atvinnuhúsnæði um helming síðasta áratuginn þyngi auðvitað róðurinn fyrir atvinnurekendur. Mörg af stærstu fyrirtækjum landsins hafi fært höfuðstöðvar sínar úr höfuðborginni til nágrannasveitarfélaga á síðustu árum og meðal skýringa séu fasteignaskattar, sem reynist hvergi hærri á höfuðborgarsvæðinu en í Reykjavík. 

„Mér finnst skorta virka atvinnustefnu í höfuðborginni og skýrari áherslu á að styðja við verðmætasköpun í Reykjavík. Til þess þarf að tryggja samkeppnishæft skattaumhverfi, sveigjanlegri stjórnsýslu og aukið framboð atvinnulóða. Því miður birtast síendurtekin dæmi af óvinveittu borgarkerfi sem leggur stein í götu atvinnurekenda. Fasteignaskattar á atvinnuhúsnæði eru þeir hæstu á höfuðborgarsvæðinu hér í Reykjavík, sífellt birtast nýjar gjaldtökur sem hrekja viðburðahald úr höfuðborginni og skortur er á atvinnulóðum.“

Fyrirtækin hrakin á brott í nafni þéttingar

Þá sé uppi grafalvarleg staða á Ártúnshöfðanum en fjöldi fyrirtækja verði á næstu árum hrakinn af því atvinnusvæði í þágu þéttingar byggðar, án þess að borgin vinni að því að tryggja fyrirtækjunum ný svæði. Sumir séu jafnvel í þeirri stöðu að þurfa að rífa atvinnuhúsnæði á svæðinu á eigin kostnað, án þess að borgin greiði nokkrar bætur. 

„Það skortir allan skilning hér í Reykjavík á því að án verðmætasköpunar verður ekki hægt að standa undir þeirri grunnþjónustu sem okkur ber að veita lögum samkvæmt. Á næsta fundi borgarstjórnar leggjum við Sjálfstæðismenn til frystingu fasteignaskatta, þannig að krónutalan haldist óbreytt milli áranna 2025 og 2026. Grunnhugsunin er að draga úr áhrifum af hækkandi fasteignamati á þá skatta sem við innheimtum af fasteignaeigendum. Við höfum raunar lagt samskonar skattalækkun til árlega allt þetta kjörtímabil, enda gríðarlegar hækkanir fasteignamats raungerst síðustu árin.“

Tillögurnar hafi verið felldar í öllum tilfellum, sem sé miður. 

„Þá helst með þeim rökum að þessi aukna skattheimta hafi reynst nauðsynleg til að snúa við rekstri borgarinnar. Við Sjálfstæðismenn erum því ósammála enda viljum við ekki kafa dýpra í vasa borgarbúa til að leiðrétta óráðsíuna í rekstri borgarinnar, mun nærtækara væri að ráðast í róttæka tiltekt í borgarkerfinu.“