Birna snýr aftur og er ein af fjórum sem fram­lengir

Keflavík segir frá því á miðlum sínum að félagið hafi samið á ný við þær Önnu Ingunni Svansdóttur, Önnu Láru Vignisdóttur, Kötlu Rún Garðarsdóttur og Birnu Valgerði Benónýsdóttur. Allar eiga þær það sameiginlegt að vera uppaldir leikmenn hjá félaginu.

Birna missti af öllu síðasta tímabil eftir að hafa slitið krossband vorið 2024 en ætlar sér að koma sterk til baka. Birna gerir tveggja ára samning en hún var einn allra besti leikmaður deildarinnar þegar hún meiddist. Birna var með 14,2 stig og 4,2 fráköst í leik tímabilið 2023-24.

Katla Rún er að koma til baka eftir barneignarfrí en hún var með undir lok síðasta tímabils en fær nú allt sumarið til að koma sér í sitt besta form.Þrátt fyrir ungan aldur þá hefur Katla spilað 253 leiki fyrir Keflavík á Íslandsmóti en aðeins fimm leikmenn hafa spilað fleiri leiki fyrir félagið.

Anna Ingunn var með 9,9 stig og 2,6 stoðsendingar að meðaltali á síðustu leiktíð og skoraði yfir tvo þrista að meðaltali í leik.

Anna Lára var með 8,5 stig, 3,3 fráköst og 2,6 stoðsendingar á síðasta tímabili sem var allt persónulegt met hjá þessum unga leikmanni.