Reyna sátta­leið eftir að aðal­fundi MÍR var aftur hleypt upp

Deilur hafa staðið um framtíð Menningartengsla Íslands og Rússlands (MÍR) allt frá því að stjórn félagsins samþykkti að leggja það niður í núverandi mynd og breyta því í styrktarsjóð árið 2022. Dómstóll ógilti þá ákvörðun í fyrra en stöðva þurfti aðalfund þar sem átti að leiða málið til lykta í fyrra eftir að hópur fólks sem taldi sig eiga rétt á að sitja fundinn reyndi að brjóta sér leið inn.

Ekki fór betur þegar enn var reynt að halda aðalfund á miðvikudag. Sigurður H. Einarsson, ritari starfandi stjórnar MÍR, segir að hópur fólks sem sé ekki félagsmenn hafi ruðst inn og neitað að fara. Því hafi þurft að fresta fundinum um óákveðinn tíma.

„Það tókst að eyðileggja þennan aðalfund eins og hinn. Þetta er bara stál í stál eins og er,“ segir Sigurður við Vísi.

Deilt um sölu á húsnæðinu og breytt form á félaginu

Forsaga deilunnar er sú að þáverandi stjórn félagsins lagði fram tillögu um að selja húsnæði þess að Hverfisgötu 105 á aðalfundinum árið 2022. Féð sem fengist fyrir það yrði notað til þess að stofna styrktarsjóð til að styrkja þýðingar á rússneskum bókmenntum.

MÍR var áður stöndugt félag með hundruð félaga en áhugi á starfseminni hefur dvínað verulega á undanförnum árum og áratugum. Sigurði telst til að aðeins átján félagsmenn séu eftir, margir þeirra komnir vel á aldur. Félagið standi ekki undir rekstri húsnæðisins og róðurinn þyngist ár frá ári.

Eftir að þáverandi stjórn samþykkti að breyta starfseminni og selja húsnæðið stefndi fyrrverandi formaður MÍR félaginu og krafðist ógildingar ákvörðunarinnar. Sökuðu stefnendur þáverandi stjórn um að reyna að eyðileggja félagið og sóa fjármunum þess. Héraðsdómur Reykjavíkur dæmdi fundinn ólöglega boðaðan og ógilti ákvarðanir hans í fyrra.

Í aðdraganda aðalfundarins í fyrra var fólk hvatt til þess að steypa stjórn MÍR sem væri mótfallin Rússlandi á vefsíðu sem tengist rússnesku rétttrúnaðarkirkjunni. Hvatningunni fylgdu leiðbeiningar um hvernig fólk ætti að leggja fé beint inn á bankareikning MÍR og skrá það sem félagsgjöld.

Starfandi stjórn MÍR telur fólk sem lagði fé þannig inn ekki félagsmenn enda geri lög félagsins ráð fyrir að sérstök félagsstjórn samþykki umsóknir nýrra félagsmanna. Sem starfsstjórn hafi hún ekki umboð til þess að taka inn nýja félaga áður en nýr aðalfundur verður haldinn.

Sló til starfandi formanns

Tillögur um sölu á húsnæðinu og umræður um framtíð MÍR voru enn á dagskrá aðalfundarins sem átti að halda í síðustu viku. Sigurður segir að hluti af fólkinu sem krafðist þess að sitja fundinn hafi verið fólk sem var félagar fyrir löngu en hefur ekki greitt félagsgjöld um árabil og hluti fólk sem lagði inn á reikning félagsins án þess að umsókn þess um aðild hafi verið samþykkt. Upphæðirnar sem fólkið lagði inn hafi heldur ekki verið réttar.

„Ég veit ekki hvernig þetta endar, nema við fáum frið til þess að halda aðalfund til að breyta lögum félagsins,“ segir Sigurður en lögunum verði aðeins breytt á aðalfundi.

Síðast þegar reynt var að halda aðalfund MÍR í maí í fyrra réðst Haukur Hauksson, álitsgjafi á Útvarpi Sögu og sjálftitlaður fréttaritari í Moskvu, á Sigurð og reif skyrtuna hans í hamaganginum. Haukur gekkst við því sjálfur í samtali við Vísi í fyrra að hafa gerst sekur um að skyrta rifnaði í rifrildi við fundinn.

Enn kom til handalögmála á fundinum í síðustu viku. Sigurður segir að þá hafi nafni sinn Þórðarson, fullgildur félagsmaður sem hefur haft sig mjög í frammi gegn starfandi stjórninni, slegið Kristján Andrésson, starfandi formann.

„Svona menn með svona dólgshátt eiga bara að vera reknir úr félaginu,“ segir Sigurður sem hyggst sjálfur leggja það til.

Fundinum hafi svo lokið með tali um að reynt yrði að koma á sáttanefnd til þess að freista þess að þoka málunum áfram.

Sigurður fullyrðir að deilurnar snúist um fasteignina að Hverfisgötu og peningana. Andstæðingar sölunnar hafi ekki sýnt sérstakan áhuga á rússneskri menningu eða MÍR nokkurn tímann þar til ákveðið var að selja húsnæðið.

Fréttin hefur verið uppfærð. Áður sagði í fréttinni að slegið hefði verið til Einars Bragasonar, fyrrverandi formanns, en það rétta er að slegið hafi verið til Kristjáns Andréssonar, núverandi formanns.