Fluttu mun minna til Banda­ríkjanna en meira annað

Útflutningurinn til Bandaríkjanna dróst saman um 21 prósent í apríl, borið saman við apríl í fyrra. Heilt yfir jókst útflutningur Kína þó um 8,1 prósent, þó Bandaríkin hafi verið stærsti viðskiptaaðili Kína.

Það er rakið til mun meiri útflutnings frá Kína til annarra ríkja í Asíu (+21%), Suður-Ameríku (+17%), Afríku (+25%) og Evrópusambandsins (+8,3 prósent).

Í grein New York Times segir að tölur um innflutning frá Taívan og Suður-Kóreu bendi til þess að Kínverjar séu að nota níutíu daga frest Trumps á tollum á vörur frá öðrum ríkjum, til að koma vörum til Bandaríkjanna gegnum önnur ríki í Asíu.

Eins og frægt er hefur forseti Bandaríkjanna sett 145 prósenta toll á vörur frá Kína og almennan tíu prósenta toll á allar vörur sem fluttar eru til Bandaríkjanna. Þar að auki hefur Trump sett tolla á ál, stál og bíla og heitið því að setja tolla á hálfleiðara og lyf.

Hann hefur einnig boðað umfangsmikla tolla á ríki sem selja meira til Bandaríkjanna en þau kaupa en þeim tollum var frestað um níutíu daga, eftir að þeir voru fyrst boðaðir.

Kínverjar hafa sett 125 prósenta tolla á bandarískar vörur.

Viðræður um helgina

Bandarískir og kínverskir erindrekar munu funda í Sviss um helgina en samkvæmt Wall Street Journal er vonast til þess að það muni opna á frekari viðræður um viðskipti ríkjanna á milli.

Heimildarmenn WSJ í Bandaríkjunum og Kína segja markmiðið að draga úr spennu milli ríkjanna.

Trump hefur gefið til kynna að undanförnu að hann ætli sér að lækka tolla á vörur frá Kína. Það gerði hann síðast nú í morgun á Truth Social, samfélagsmiðli hans.

„Áttatíu prósenta tollur á Kína virðist rétt! Scott B. ræður því,“ skrifaði Trump og vísaði hann þar til Scott Bessent, fjármálaráðherra hans.

Skömmu áður hafði Trump skrifað:

„KÍNA ÆTTI AÐ OPNA MARKAÐ SINN FYRIR BANDARÍKJUNUM. VÆRI SVO GOTT FYRIR ÞÁ!!! LOKAÐIR MARKAÐIR VIRKA EKKI LENGUR!!!“