Gríðar­legt á­hyggju­efni fyrir Norðurþing

Greint var frá því í morgun að rekstrarstöðvun væri yfirvofandi hjá kísilveri PCC BakkaSilicon á Húsavík. Kári Marís Guðmundsson forstjóri hefur sagt að ástæður erfiðleikanna séu aðstæður á mörkuðum sem séu mjög erfiðar nú um stundir en fyrirtækið framleiðir kísilmálm og selur til útlanda. 

Endanleg ákvörðun um rekstrarstöðvun hafi ekki verið tekin en Kári segir að ef ekkert breytist á næstu vikum yrði ekki annað í stöðunni en að klára hráefni sem til er og fara svo í einhverskonar rekstrarstöðvun. Katrín segist hafa miklar áhyggjur af stöðunni.

„Verksmiðja PCC á Bakka er þessu samfélagi hér á Norðurþingi gríðarlega mikilvæg. Þetta er stórt fyrirtæki og skiptir höfuðmáli fyrir okkur að þetta sé í góðum rekstri,“ segir Katrín Sigurjónsdóttir sveitarstjóri Norðurþings í samtali við fréttastofu.

Starfsmenn fyrirtækisins eru nú um 130 talsins og yrðu áhrif rekstrarstöðvunar þess gríðarleg á sveitarfélagið að sögn Katrínar. Þegar hefur fyrirtækið gengið í gegnum endurskipulagningu og fækkað í starfsmannahópi um tuttugu manns á þessu ári.

„Ég get kannski bætt því við að hérna við höfum verið í góðu samtali við forstjóra PCC og yfirmenn þar sem eru að vinna hörðum höndum að framtíð fyrirtækisins og ég vona bara að það gangi vel hjá þeim.“

Einnig verði til afleidd störf á svæðinu vegna verksmiðjunnar sem skipti gríðarlegu máli en Katrín segir vel fylgst með stöðunni.

„Við vitum ekki hvernig þetta endar, við erum í mjög góðu samtali við forstjórann og forsvarsmenn PCC og við höfum einnig verið í samtali við ráðamenn, þingmennina okkar, þannig að við erum bara að fylgjast með stöðunni dag frá degi.“