Segja fjöru­tíu milljarða í boði fyrir Verstappen

Breska blaðið The Telegraph vitnar í La Gazetta dello Sport á Ítalíu og segir að með sádiarabískum stuðningi sé Aston Martin tilbúið að bjóða Verstappen 230 milljónir punda fyrir að keppa fyrir liðið í Formúlu 1 næstu þrjú árin. Það jafngildir tæplega fjörutíu milljörðum íslenskra króna og er skiljanlega lýst sem „tilboði aldarinnar“.

Opinber fjárfestingasjóður Sádi-Arabíu, PIF, á nú þegar 20% hlut í Aston Martin Lagonda og styrkir félagið í gegnum olíurisann Aramco en hefur í hyggju að taka alveg yfir félagið. Peningarnir eru því til staðar og Aston Martin hefur þegar fengið til sín bílahönnuðinn Adrian Newey sem hannaði alla fjóra bílana sem Verstappen vann heimsmeistaratitla sína fyrir Red Bull á.

Mikið hefur verið rætt og ritað um það undanfarið hvort Verstappen sé á förum frá Red Bull Racing og þá hvert.

„Eins og ég sé þetta þá hafa fjögur lið áhuga á Max Verstappen,“ sagði Ralf Schumacher, fyrrverandi ökuþór og sérfræðingur Sky í Þýskalandi, í vikunni. Þar átti hann við Aston Martin, Mercedes, McLaren og Alpine.

Telegraph segir að reglubreytingar sem taki gildi næsta tímabil muni henta Aston Martin og Mercedes, og það gæti hjálpað til við að klófesta Verstappen.

Verstappen er líkt og aðrir Formúlu 1 ökumenn nú staddur í Sádi-Arabíu þar sem tímataka fer fram síðdegis í dag en kappaksturinn á morgun, páskadag.