Veðbankar vestan­hafs halda með mót­herjum Lakers

Í grein á The Athletic segir starfsmaður veðmálafyrirtækisins BetMGM að Lakers sé ávallt vinsælt þegar kemur að líklegum sigurvegara í NBA-deildinni. Sama á við um New York Yankees í MLB-deildinni í hafnabolta og Dallas Cowboys í NFL-deildinni.

Í ár má segja að fólk hafi farið yfir um þegar Luka gekk í raðir Lakers. Ekki nóg með að hann skákaði liðsfélaga sínum LeBron, sem og Stephen Curry, hvað varðar treyjusölu heldur virðist fjöldi fólks trúa því að Lakers geti unnið sinn fyrsta NBA-titil síðan í „búbblunni.“

„Lakers og LeBron eru með hvað stærstan aðdáenda hóp í NBA-deildinni. En eftir að Luka gekk til liðs við félagið varð þetta í raun að hinum fullkomna stormi,“ sagði Hal Egeland, starfsmaður BetMGM.

Sem stendur eru Lakers taldir fjórða líklegasta liðið til að fara alla leið. Þar á undan koma ríkjandi meistarar Boston Celtics og efstu lið Austur- og Vesturdeildar, Oklahoma City Thunder og Cleveland Cavaliers.

Það breytir því ekki að hvað stærst prósenta þeirra sem hafa veðjað á líklegan sigurvegara hafa sett peninginn sinn á Lakers. Það er því ljóst að helstu veðbankar vestanhafs halda allir með mótherjum Lakers í úrslitakeppninni.

Fyrsti mótherji Lakers verður Minnesota Timberwolves með þá Anthony Edwards, Julius Randle og Rudy Gobert í broddi fylkingar.

Úrslitakeppni NBA-deildarinnar hefst nú um helgina og verður fjöldi leikja sýndur beint á rásum Stöðvar 2 Sport 2. Klukkan 19.30 á laugardag tekur Denver Nuggets á móti Los Angeles Clippers í beinni útsendingu. Sléttum sólahring síðar sýnum við ykkur leik Orlando Magic og Boston Celtics.