Olíu­vinnsla á Dreka­svæðinu geti staðið undir rekstri ríkisins í tuttugu ár

Olíuleit á Drekasvæðinu er aftur í umræðunni eftir að bæjarráð Fjarðarbyggðar beindi því til stjórnvalda að meta að nýju hagkvæmni olíuleitar á Drekasvæðinu í ljósi þess að orkuskipti hefðu gengið hægar en gert var ráð fyrir.

Jóhann Páll Jóhannsson, umhverfis-orku og loftslagsráðherra, sagði í viðtali við Ríkisútvarpið skömmu seinna að það væri ekki á dagskrá að fara aftur í olíuleitarútboð á svæðinu. Stóra verkefnið væri að fasa út jarðefnaeldsneytið og tækifæri Íslands væru í endurnýjanlegri orku.

Drekasvæðið mögulega stærsta olíu- og gaslind í Norður-Atlantshafi

Talið er að á Drekasvæðinu séu um tíu milljarðar olíutunna, sem þýðir að þar sé mögulega stærsta olíu- og gaslind í Norður-Atlantshafi.

Heiðar Guðjónsson segir að það sé ábyrgðarhluti Íslendinga að nýta ekki auðlindirnar við landið.

„Vegna þess að við höfum þannig auðlindasögu að segja að við göngum alveg svakalega vel um náttúruna. Þannig það er ábyrgðarhluti að nýta þetta ekki hér þar sem við værum að nýta þetta með ábyrgum hætti og frekar að kaupa olíu frá Mið-Asíu og Arabíuskaga, og einræðisríkjum víðar eins og í Afríku, þar sem umhverfissjónarmið hafa engan grunn,“ segir Heiðar.

Heiðar var til viðtals um málið í Reykjavík síðdegis á Bylgjunni fyrr í vikunni.

Hann segir að tekjur ríkisins af olíunni á svæðinu geti numið þrjátíu og þrjú þúsund milljörðum króna á um það bil tuttugu árum. 

„Þegar þetta er svona mikið magn á einum stað, að þá getur þetta enst í nokkra áratugi, og það væri auðvitað bara betra fyrir okkur að dreifa þessari framleiðslu yfir einhvern ákveðinn tíma, ef þetta er svona mikið magn, að þá er auðvitað, ja íslensku fjárlögin á hverju einasta ári, í yfir tuttugu ár, sem kæmu þarna upp, bara í skattheimtu fyrir íslenska ríkið,“ segir Heiðar.

Auðlindin sjálf sé metin á sextíu og sex þúsund milljarða.

Enn langt í með rafvæðingu samgangna

Heiðar hefur ekki skilning á sjónarmiðum Jóhanns Páls, sem sagði að tækifæri Íslands væru bara í endurnýtanlegri orku.

„Nei ég hef engan skilning á þessu vegna þess að við erum eyja mjög einangruð frá okkar helstu mörkuðum og þjóðum sem við eigum samskipti við, og það eru engin skip sem ganga fyrir endurnýjanlegum orkugjöfum í dag, það eru engar flugvélar, og svo framvegis. Við erum og við eigum mjög langt í land með að rafvæða alla hluti.“

„Við erum í fararbroddi í Evrópu og í heiminum öllum með hlutfall endurnýjanlegra orkugjafa af okkar orkunotkun. Við erum með svona 85 prósent endurnýjanlega orku sem við erum að nota hér á Íslandi á meðan Evrópa nær varla 15 prósentum, þannig það svo sannarlega dæmist ekki á okkur að gera eitthvað sérstaklega meira í þessu, við erum í algjörum sérflokki.“

Hann bendir á að í Noregi séu mörg þúsund virk olíuleitarleyfi virk, og á síðustu tveimur árum hafi 150 ný olíuleitarleyfi verið gefin út.

Bjartsýnn á leyfi að lokum

Hann kveðst bjartsýnn á að skynsemin muni sigra og segir að skynsemin í þessu máli sé einföld.

„Hún er að við getum gert þetta og það regluverk sem við notum er norskt regluverk og norska ríkisolíufélagið er mjög tilbúið að vinna með okkur.  Þannig að þetta á að vera gert á algjörlega frábæran hátt, og þá eins og ég segi nýtur umhverfið þess, vegna þess að þá minnkar framleiðsla á öðrum stöðum þar sem er ekki svona vandað til verka.“

Formenn stjórnarandstöðuflokkanna hafa lýst yfir stuðningi við því að olíuleitarleyfi verið gefið út að nýju, í umfjöllun Viðskiptablaðsins um málið í vikunni.

Sigurður Ingi sagðist ekki vilja útiloka olíuleit, en það væri eftir sem áður forgangsverkefni stjórnvalda að hraða orkuskiptum og það væri áhersla Framsóknarflokksins.

Sigmundur Davíð sagði að Miðflokkurinn hefði talað fyrir olíu- og gasleit fyrir kosningar og að olíuleitin myndi strax hafa jákvæð áhrif á samfélagið. Guðrún Hafsteinsdóttir sagði að skoða ætti olíuleit með opnum huga.