Eig­enda­skipti hjá Fótbolta.net

Hafliði hefur gegnt lykilhlutverki í þróun og vexti Fótbolti.net frá því hann stofnaði vefinn árið 2002. Hann átti 95 prósenta hlut í vefnum á móti knattspyrnuþjálfaranum Magnúsi Má Einarssyni sem einnig seldi sinn hlut. 

Mate, sem hefur starfað við auglýsingasölu hjá vefnum í fimmtán ár, verður framkvæmdastjóri og eignast meirihluta í félaginu en auk hans eignast fjórir til viðbótar hlut í félaginu. Hann segir kaupin tákna mikla trú á framtíð Fótbolti.net og mikilvægi miðilsins í íslensku íþróttalífi.

Halda sig við fótboltann

„Fótbolti.net hefur verið ómetanlegur vettvangur fyrir fótboltaáhugafólk á Íslandi. Við ætlum að halda áfram því góða starfi sem þegar hefur verið unnið, styðja við ritstjórnina og þróa miðilinn enn frekar með nýjum tæknilausnum og efni,“ segir Mate.

Hann á ekki von á neinum stórum breytingum einn, tveir og þrír. Lögð verði áhersla á að sinna hverjum einasta leik í efstu tveimur deildunum hér heima, elta landsliðin út um allt og vera leiðandi í allri umfjöllun um knattspyrnu.

„Það er vika í að allt fari á fullt í íslenskum fótbolta. Við erum að setja okkur í stellingar,“ segir Mate. Hann er mikill körfuboltasérfræðingur og þjálfað íþróttinni undanfarin ár. Hann segir körfuboltann ekkert munu bætast við umfjöllun miðilsins.

„Nei, við erum bara fotbolti.net. Ætlum ekki að víkka okkur út í aðrar boltaíþróttir.“

Umfjöllun um íþróttir skipti máli

Hann er mjög spenntur fyrir nýja starfinu.

„Mér finnst þetta vera draumagigg því ég elska bæði íþróttir og fjölmiðla,“ segir Mate. Sjálfur hafi hann gaman af því að mæta í viðtöl, taka þátt í umræðu og segir mikilvægt að huga vel að umfjöllun um íþróttir. Hann á ekki von á að standa í körfuboltaþjálfun samliða en útilokar ekkert.

„Menn mega alveg hringja og taka fund en það þarf að vera mjög spennandi á þessum tímapunkti.“

Stofnandi vefsins Hafliði Breiðfjörð hefur gegnt lykilhlutverki í þróun og vexti Fótbolti.net frá upphafi. Honum er þakkað fyrir sín brautryðjendastörf og ómetanlegt framlag til íslenskrar knattspyrnuumfjöllunar undanfarin 23 ár. Með elju sinni, hugsjón og fagmennsku hafi hann markað djúp spor í íslenska fótboltasögu og skapað vettvang sem hafi sameinað knattspyrnuáhugamenn um land allt. 

Magnúsi Má eru sömuleiðis færðar þakkir fyrir frábær störf fyrir vefinn.

Daníel verður stjórnarformaður

„Með kaupunum er tryggt að Fótbolti.net heldur áfram sem sjálfstæður og öflugur miðill, þar sem fagmennska, áreiðanleiki og ástríða fyrir fótbolta eru í forgrunni. Núverandi starfsfólk heldur áfram störfum og verður breytingin því hnökralaus fyrir notendur vefsins,“ segir í tilkynningu.

Daníel Rúnarsson er meðal annarra eigenda og verður nýr stjórnarformaður.

„Fótbolti.net hefur um árabil verið ein helsta upplýsingaveita landsins fyrir allt sem við kemur fótbolta, með ítarlegum leikjalýsingum, fréttaflutningi, viðtölum og greiningum. Nýir eigendur hyggjast styrkja þessa stöðu enn frekar á komandi misserum,“ segir Daníel. Hann hefur tengst vefnum með ýmsu móti frá árinu 2005, fyrst sem ljósmyndari og síðar hönnuður og ráðgjafi.

Hafliði ekki að verða ríkur

Hafliði Breiðfjörð kveður Fótbolta.net og segir frábæran tíma að baki. Hann hafi verið að skoða möguleikann á sölu undanfarin þrjú ár og lagt áherslu á að setja það í góðar hendur.

„Mér er svo annt um að fyrirtækinu gangi vel og starfsfólkið verði áfram í góðum höndum. Svo ég ákvað að ana ekki út í neitt,“ segir Hafliði. Hann hafi fengið ýmis tilboð en magatilfinningin hafi sagt honum að þessi nýi eigendahópur væri sá rétti. Þeir Mate hafa starfað saman í 15 ár hjá Fótbolta.net og svo þekkir Hafliði Daníel vel.

Aðspurður segir Hafliði að kaupverðið sé trúnaðarmál. Hann sé ekki að verða ríkur. Hann hefur reglulega hvatt fólk til að finna sér starf sem það elski, því þá þurfi það aldrei aftur að vinna. Þannig hafi það verið hjá Fótbolti.net.

„Ég mun örugglega ljósmynda íþróttir áfram, koma að skrifum. Það er áhugamálið mitt, íþróttafréttamennska og íþróttaljósmyndun.“

Einbeitir sér að sjálfum sér

Ástæðan fyrir sölunni sé ákveðin þreyta. Hann hafi verið með fólk í vinnu undanfarin þrjátíu ár og því fylgi erill og áhyggjur sem hann hafi verið tilbúin að losna við.

„Ég vil geta hugsað um sjálfan mig en ekki aðra alla daga,“ segir Hafliði. Hann ætli að einbeita sér að sjálfum sér fram á haust, koma sér í betra stand og er sannfærður um að eitthvað komi til hans með haustinu.

„Ég get gert allt og er ekki yfir neitt hafinn.“

Hann muni poppa upp einhvers staðar þar sem enginn eigi von á.