Spá 1,8 prósent hag­vexti í ár og 2,7 prósent verð­bólgu á næsta ári

Þetta kemur fram í nýrri þjóðhagsspá Hagstofu Íslands fyrir árin 2025 til 2030.

„Árið 2026 er talið að verg landsframleiðsla aukist um 2,7%, einkum vegna bata í utanríkisviðskiptum og aukinni einkaneyslu. Árið 2027 er reiknað með 2,8% hagvexti á breiðum grunni,“ segir í samantekt á vef Hagstofunnar.

Þar segir að dregið hafi úr verðbólgu síðustu misseri og í febrúar hafi vísitala neysluverðs hækkað um 4,2 prósent frá fyrra ári. Húsnæði hafi verið helsti drifkraftur verðbólgunnar en án húsnæðis hækkaði neysluverðsvísitalan um 2,7 prósent í febrúar.

Horfur séu á áframhaldandi hjöðnun verðbólgunnar.

„Dregið hefur úr spennu í hagkerfinu, kjarasamningar til lengri tíma hafa skapað fyrirsjáanleika í launaþróun og hægst hefur á húsnæðismarkaði. Í ár er reiknað með að vísitala neysluverðs hækki um 3,5% að meðaltali á milli ára. Árið 2026 er spáð að verðbólga verði 2,7% að meðaltali en nálægt verðbólgumarkmiði eftir það.“

Atvinnuleysi var 3,4 prósent að meðaltali árið 2024 en vísbendingar eru um að það sé að aukast. Spáð er 4 prósent atvinnuleysi í ár og 4,1 prósent á næsta ári.

„Kjarasamningar hafa verið undirritaðir til langs tíma á langstærstum hluta vinnumarkaðarins. Í spánni er gert ráð fyrir að launaþróun verði í takt við umsamdar launahækkanir og að launavísitala miðað við fast verðlag hækki um 2,7% í ár og 1,7% árið 2026.“

Þjóðhagsspá Hagstofu Íslands.