Nýir eig­endur endur­reisa Snúruna

Í fréttatilkynningu segir að stofnendur verlsunarinnar og húsgagnaverslunin Bústoð hafa komist að samkomulagi um kaup Bústoðar á rekstri Snúrunnar og muni helstu vörumerki Snúrunnar halda áfram þegar Snúran opnar aftur, svo sem Design by Us, ByOn, Blomus, Jakobsdal, Dottir Nordic Design, Aida og DAY.

Greint var frá því í nóvember að Rakel Hlín Bergsdóttir, eigandi Snúrunnar, hefði ákveðið að láta gott heita af rekstri verslunarinnar eftir tíu ára rekstur.

Rakel verður nýjum eigendum innan handar

Í tilkynningu segir að Rakel verði nýjum eigendum til ráðgjafar næstu mánuði til að gæta þess að sérkenni Snúrunnar haldi sér. Fyrirhugað sé að opna netverslun Snúrunnar og verslun að Miðhrauni 24 í Garðabænum í enda mars.

„Við erum að stefna á að opna Snúruna í Garðabænum í lok mars. Fram að því munum við fá inn úrval af nýjum vörum frá birgjum Snúrunnar, en við tókum engar eldri vörur, heldur pöntum allt nýtt inn. Eins mun heimasíða Snúrunnar opna á sama tíma með mjög miklu vöruúrvali, bæði í gjafavöru og húsgögnum,“ er haft eftir Birgittu Ósk Helgadóttir, nýjum verslunarstjóra Snúrunnar. 

Hún, ásamt Björgvini Árnasyni, eigi og reki húsgagnaverslunina Bústoð. Þau búi samanlagt yfir þrjátíu ára reynslu af verslunarrekstri.

Í kjölfar opnunar í Garðabænum sé stefnt að því að opna Snúruna í Reykjanesbæ með vorinu. Það séu því bjartir tímar framundan hjá Snúrunni.

Muni lifa góðu lífi

Haft er eftir Rakel Hlín að hún sé gríðarlega ánægð með þessar málalyktir. Þó að fyrirtækið sé komið í nýjar hendur muni hún áfram aðeins skipta sér af og vera til ráðgjafar um pantanir og annað slíkt.

„Ég verð hins vegar að segja að eftir að hafa kynnst Birgittu í gegnum þetta ferli og meðal annars farið með henni á sýningu í París, hef ég trú á því að Snúran muni ekki bara lifa, heldur lifa góðu lífi hjá nýjum eiganda. Þess vegna líður mér svona vel með þessa niðurstöðu.“