Hildur nýr mann­auðs­stjóri Dis­ti­ca

Í tilkynningu segir að Hildur sé 39 ára og hafi starfað í mannauðsmálum undanfarinn áratug. 

„Um er að ræða nýja stöðu innan félagsins sem er liður í því að auka vægi mannauðsmála og styrkja stefnumiðað mannauðsstarf félagsins. Distica leggur áherslu á velgengni og vellíðan starfsfólks, sem er grundvöllur áframhaldandi vaxtar og árangurs félagsins. Síðastliðin tvö ár hefur Hildur starfað náið með Distica í gegnum móðurfélag félagsins. Hildur hefur lokið meistaragráðu í markaðsfræðum og alþjóðaviðskiptum, auk diplómu í mannauðsstjórnun og leiðtogafærni. Þá hefur hún bætt við sig menntun í stjórnendamarkþjálfun,“ segir í tilkynningunni. 

Distica er leiðandi á markaði og í vörustjórnun fyrir fyrirtæki á heilbrigðismarkaði og dreifir m.a. lyfjum, rannsóknartækjum, rekstrarvörum og neytendavörum til sjúkrahúsa, hjúkrunarheimila, tannlækna, dýralækna og verslana. Árstekjur Distica 2023 voru um 33 milljarðar og stöðugildi um 120.