Golf

Gunn­laugur vann en Evrópa tapaði

Sindri Sverrisson skrifar
Gunnlaugur Árni Sveinsson með högg á vellinum í Sameinuðu arabísku furstadæmunum.
Gunnlaugur Árni Sveinsson með högg á vellinum í Sameinuðu arabísku furstadæmunum. EGA

Gunnlaugur Árni Sveinsson vann indverska undrabarnið Kartik Singh í einvígi á lokadegi Bonallack-bikarsins í golfi, í Sameinuðu arabísku furstadæmunum í dag. Evrópa tapaði hins vegar keppninni, gegn úrvalsliði Asíu og Eyjaálfu, með aðeins eins vinnings mun.

Gunnlaugur Árni stóð sig vel á mótinu en þetta er í fyrsta sinn sem að Íslendingur er valinn í úrvalslið Evrópu á þessu móti.

Hann vann hinn aðeins 15 ára gamla Singh í dag, 3/2, eftir spennandi leik. Gunnlaugur komst tvisvar yfir á fyrri níu holunum en Singh jafnaði í bæði skiptin. Gunnlaugur vann svo 12. og 13. holu, og einnig þá 15. og tryggði sér svo sigur með jafntefli á 16. holu.

Hann var einn af fjórum Evrópubúum sem unnu sigur í sínu einvígi í dag en Asía/Eyjaálfa vann fimm einvígi og þrjú enduðu með jafntefli.

Því vann Asía/Eyjaálfa sigur í heildarstigakeppninni, með 16,5 vinning gegn 15,5, eftir að liðin höfðu endað jöfn bæði í gær og í fyrradag.

Gunnlaugur Árni, sem valinn var karlkylfingur ársins á Íslandi 2024, heldur nú til Bandaríkjanna þar sem hann iðkar golf og stundar nám við Louisiana State University.

Golf

Tengdar fréttir

Allt jafnt fyrir lokadaginn

Gunnlaugur Árni Sveinsson og Svíinn Algot Kleen urðu að sætta sig við tvö töp í dag, á öðrum degi Bonallack-bikarsins í golfi. Staðan er engu að síður jöfn í keppninni, sem er á milli úrvalsliðs Evrópu og úrvalsliðs Asíu og Eyjaálfu.

Kylfurnar eftir í Amsterdam en Gunn­laugur nýtur sín meðal þeirra bestu

„Það er mikill heiður að vera valinn til að spila fyrir land og heimsálfu, og ég er mjög þakklátur fyrir það,“ segir Gunnlaugur Árni Sveinsson, landsliðskylfingur úr GKG og einn aðeins tólf liðsmanna úrvalsliðs Evrópu í Bonallack-bikarnum í golfi. Það gekk ekki áfallalaust hjá honum að komast á mótið.

Sjóðheitur Gunnlaugur tryggði Evrópu einn sigur

Gunnlaugur Árni Sveinsson, landsliðskylfingur úr GKG, braut blað í íslenskri golfsögu í dag þegar hann keppti í Bonallack-bikarnum fyrir hönd Evrópu. Hann stóð sig frábærlega í fjórbolta og átti heiður að einu stigi fyrir Evrópuliðið.

Gunnlaugur í úrvalslið Evrópu og bestur ásamt Huldu

Gunnlaugur Árni Sveinsson og Hulda Clara Gestsdóttir hafa verið útnefnd kylfingar ársins á Íslandi, í fyrsta sinn. Árið endar því heldur betur vel hjá þeim og sérstaklega hinum 19 ára Gunnlaugi sem nú hefur verið valinn í úrvalslið Evrópu fyrir Bonallack Trophy mótið.

Mest lesið


Fleiri fréttir

Sjá meira


×

Mest lesið