Hátt­semi Helga nái aftur til 2017

Þetta kemur fram í tilkynningu Sigríðar til fjölmiðla, sem send er út í tilefni af umfjöllun um mál Helga Magnúsar. Í gær var greint frá því að Sigríður hafi vísað málefni hans til dómsmálaráðherra. Helga hafi verið tilkynnt að starfskrafta hans væri ekki óskað meðan ráðherra væri með mál hans til skoðunar. 

Helgi tjáði sig fyrir nokkru um mál Mohamads Thors Jóhannessonar (áður Mohamad Kourani), en Helgi og fjölskylda hans máttu sæta hótunum frá Mohamad um árabil. Tilefni viðtals Vísis við Helga var átta ára fangelsisdómur yfir Mohamad. Þar sagði Helgi meðal annars að þó Mohamad væri ýkt dæmi, væri verið að flytja til landsins menningu sem þekkist almennt ekki hér á landi, en Mohamad kom hingað til lands frá Sýrlandi.

Það eina sem stoppar þá er hnefinn, valdbeiting. Ekki er alls staðar sú sama afstaða til laga og réttar og hjá okkur. En við verðum að sætta okkur við það

Solaris, hjálparsamtök fyrir hælisleitendur og flóttafólk á Íslandi, lögðu fram kæru á hendur Helga fyrir ummæli sín í síðustu viku.

Áminntur áður

Helgi var árið 2022 áminntur af Sigríði, en þá var fjallað um að áminning hefði lotið að orðum Helga um að hælisleitendur kynnu að ljúga um kynhneigð sína, til þess að eiga frekari möguleika á því að fá hér hæli. 

Auðvitað ljúga þeir. Flestir koma í von um meiri pening og betra líf. Hver lýgur sér ekki til bjargar? Þar fyrir utan er einhver skortur á hommum á Íslandi?

Hann áréttaði svo að honum þætti vænt um samkynhneigða og hefði aldrei haft nokkuð á móti þeim. Þó mætti ekki gera ráð fyrir að hælisleitendur, sem segðust samkynhneigðir, segðu satt til um það.

Upplýsir ekki um tilvikin

Í tilkynningu til fjölmiðla nú segir Sigríður að áminningin árið 2022 hafi lotið að fleiri tilvikum tjáningar hans en því sem beindist að hælisleitendum og samkynhneigðum karlmönnum. 

„Um nokkur tilvik var að ræða sem náðu aftur til ársins 2017. Ríkissaksóknari telur sér ekki heimilt að upplýsa nánar um þetta. Þá skal einnig tekið fram að kærur tiltekinna samtaka voru ekki ákvörðunarástæða fyrir framsendingu máls Helga Magnúsar til dómsmálaráðherra nú né heldur þegar ríkissaksóknari áminnti Helga Magnús,“ segir í stuttri tilkynningu Sigríðar. 

Lögmenn velta áminningunni fyrir sér

Áðurnefnd áminning hefur orðið tilefni til vangavelta um hvort ríkissaksóknari hafi vald til að áminna vararíkissaksóknara svo nokkuð mark sé takandi á því. 

Meðal þeirra fram spurningu um slíkt er Sigurður G. Guðjónsson hæstaréttarlögmaður.

„Ríkissaksóknari vill losna við vararíkissaksóknara. Bæði eru embættismenn skipuð ótímabundið af dómsmálaráðherra. Ríkissaksóknari áminnti vararíkissaksóknara fyrir tveimur árum. Ekki verður í fljótubragði séð hvaðan ríkissaksóknara kom vald til að áminna vararíkissaksóknara,“ skrifar Sigurður á Facebook.

Áminningarvaldið sé hjá dómsmálaráðherra.

„Dómsmálaráðherra hefur ekki svo vitað sé áminnt vararíkissaksóknara, sem starfs síns vegna hefur ásamt fjölskyldu sinni mátt þola líflátshótanir, frá einstaklingi sem ríkið hefur veitt vernd. Vonandi má vararíkissaksóknari greina frá líflátshótunum og frá hverjum þær stafa án þess að eiga á hættu að missa starf sitt.“

Arnar Þór Stefánsson hæstaréttarlögmaður bendir á að fyrri áminning hljóti því að vera markleysa vegna valdþurrðar.