Elvar Árni sigraði Gagnaglímuna í ár

Í keppninni er einnig valið í tíu manna lið sem tekur þátt í Netöryggiskeppni Evrópu European Cyber Security Challenge (ECSC) fyrir Íslands hönd. Í ár er keppnin haldin í Tórínó á Ítalíu.

„Gagnaglíman er vettvangur sem hvetur til ástundunar á netöryggi á skemmtilegan hátt, þar sem keppendur glíma við raunhæf verkefni og líkja eftir árásaraðferðum tölvuþrjóta. Margir tengja netöryggi við staðalímyndina um „tölvunördinn“, og halda að það sé allt of flókið að komast inn í þennan heim, en það er þó alls ekki þannig,“ segir Hjalti Magnússon stjórnandi keppninnar og að færni í netöryggi snúist að mestu um skapandi hugsun, eða að hugsa út fyrir kassann.

„Svo má ekki gleyma að það sama á við um netöryggi og allt annað sem maður tekur sér fyrir hendur að færni krefst bara áhuga og ástundunar,“ segir Hjalti.

Samtals tóku 16 keppendur þátt í ár. Þrír í yngri flokki, 14-20 ára, og þrettán í eldri flokki, 21-25 ára.

Elvar Árni Bjarnason sigraði keppnina í ár með 6840 stigum. Samúel Arnar Hafsteinsson var í öðru sæti með 4836 stig og Kristinn Vikar Jónsson var í þriðja sæti með 3421 stig.

Matthías besti nýliðinn

Besti nýliðinn í yngri flokki var Matthías Andri Hrafnkelsson og besti nýliðinn í eldri flokki var Haraldur Jón Friðriksson.

Verðlaun fyrir bestu frammistöðu í staðbundnum verkefnum hlaut Elvar Árni Bjarnason.

Verkefni keppninnar eru af ýmsum toga, en snúast í flestum tilfellum í að notfæra sér öryggisveikleika í tölvukerfum.

Þau geta falið í sér að notfæra sér galla í hugbúnaði, eins og vefsíðum eða forritum eða að brjóta óörugga dulkóðun. Aðferðirnar sem keppendur beita eru í raun þær sömu og hakkarar beita við árásir á raunverulegum tölvukerfum.

Verkefnin eru öll smíðuð af dæmahöfundum keppninnar og keyrð í einangruðu umhverfi, þannig keppnin felur ekki í sér árásir á neinn hugbúnað sem er í raunverulegum rekstri.