Innlent

Baldur með nokkurt for­skot á Jón og Katrínu

Kolbeinn Tumi Daðason skrifar
Stuðningsfólk Baldurs vildi máta hann við sex kandídata til embættis forseta Íslands. Þrír höfðu ekki tilkynnt um framboð þegar könnunin hófst en Jón Gnarr bættist í framboðshópinn í gærkvöldi. Halla Hrund og Katrín eru enn undir feldi.
Stuðningsfólk Baldurs vildi máta hann við sex kandídata til embættis forseta Íslands. Þrír höfðu ekki tilkynnt um framboð þegar könnunin hófst en Jón Gnarr bættist í framboðshópinn í gærkvöldi. Halla Hrund og Katrín eru enn undir feldi. Vísir/SaraRut

Baldur Þórhallsson stjórnmálafræðingur hefur nokkuð forskot á keppinauta sína í baráttunni um að verða arftaki Guðni Th. Jóhannessonar sem forseti Íslands. Þetta sýnir ný könnun sem Prósent vann fyrir stuðningsfólk Baldurs og Vísir hefur undir höndum.

Farin var sú leið að bera Baldur saman við þá sem mest hefur borið á í umræðu í tengslum við embættið. Þannig vildi stuðningsfólk Baldurs máta hann við líklegustu keppinauta. Svarendur Prósents fengu lista yfir nokkra einstaklinga sem hafa ýmist stofnað meðmælasöfnun fyrir forsetaframboð eða verið orðaðir við framboð. Spurt var:

Hver af eftirfarandi myndir þú vilja að verði næsti forseti Íslands, óháð því hvort að einstaklingurinn hafi tilkynnt framboð sitt eða ekki? 

Könnun var framkvæmd dagana 28. mars til 3. apríl, úrtakið var 2500 manns og svarhlutfall 52 prósent.

1256 svöruðu könnuninni. Tæplega fimmtungur tók ekki afstöðu. Hægt er að smella á myndirnar til að stækka þær og rýna í tölurnar.Prósent

Baldur Þórhallsson fékk 27 prósent atkvæða. Næst á hæla honum komu hnífjöfn Jón Gnarr leikari og Katrín Jakobsdóttir forsætisráðherra með 17 prósent. Halla Tómasdóttir, forstjóri B team, er í fjórða sæti með tíu prósent.

Nafna hennar Halla Hrund Logadóttir orkumálastjóri og Arnar Þór Jónsson lögmaður koma þar á eftir með fjögur prósent. Helga Þórisdóttir forstjóri Persónuverndar rekur svo lestina af þeim sem spurt var um með eitt prósent.

Nítján prósent þeirra 1256 sem svöruðu könnuninni svöruðu „veit ekki“.

Hér má sjá niðurstöðurnar með tilliti til kyns og aldurs þeirra sem tóku þátt í könnuninni. Smellið á myndina til að stækka hana.Prósent

Ýmislegt hefur gerst á þeim sex dögum sem könnunin tók til. Jón Gnarr tilkynnti um framboð í gær, Guðmundur Felix Grétarsson bættist í hópinn í dag og Steinunn Ólína Þorsteinsdóttir er byrjuð að safna meðmælum. Þá tjáði Katrín Jakobsdóttir sig loksins í dag um framboð sem hún sagðist íhuga alvarlega. 

Þá ber að nefna að um sextíu manns eru skráðir í meðmælasöfnun á vefsíðunni Ísland.is. Þó liggur fyrir að hluti þeirra gerði það fyrir mistök, aðrir í gríni og svo aðrir af alvöru án þess að hafa kynnt framboð sín sérstaklega til leiks.

Áhugavert er að skoða bakgrunnsbreytur þeirra sem tóku afstöðu í könnun Prósents fyrir stuðningsfólk Baldurs. Þar sést meðal annars að Baldur nýtur meira fylgir meðal kvenna og hið sama gildir um Höllu Tómasdóttur. Katrín og Jón njóta ívið meirri stuðnings hjá körlum.

Hér má sjá fylgi þeirra sjö sem spurt var um miðað við búsetu og menntun þátttakenda í könnuninni. Smellið á myndina til að stækka hana.Prósent

Baldur nýtur mest fylgis í öllum aldurshópum nema þeim yngsta. Þar eru yfirburðir Jóns Gnar algjörir. Jón nýtur 49 prósents fylgis meðal fólks á aldrinum 18-24 ára á meðan innan við fjögur prósent þeirra eldri en 65 ára vilja sjá hann sem forseta.

Hér má sjá afstöðu fólks eftir stöðu þess á vinnumarkaði og tekjum. Smellið á myndina til að stækka hana.Prósent

Þegar horft er til tekna fólksins þá hefur Baldur mest fylgi í öllum flokkum nema hátekjuflokknum. Þangað sækir Katrín Jakobsdóttir mest fylgi eða 34 prósent.

Afstaða eftir hjúskaparstöðu og fjölda barna á heimili. Smellið á myndina til að stækka hana.Prósent

Gögnunum var safnað frá 28. mars til 3. apríl en um er að ræða netkönnun meðal könnunarhóps Prósents. Úrtakið var 2500 manns, einstaklingar átján ára og eldri og var svarhlutfall 52 prósent. 

„Gögn voru vigtuð til að úrtak endurspegli álit þjóðarinnar. Tekið er tillit til kyns, aldurs og búsetu. Tölur eru því námundaðar að næstu heilu tölu. Misræmi getur því verið á samanlögðum fjölda einstaklinga í greiningum og tíðnitöflum.“

Forsetakosningar 2024 Skoðanakannanir

Tengdar fréttir

Telur að Katrín yrði mjög öflugur kandídat

„Það yrði allavega mjög öflugur kandídat til forsetaembættisins sem kæmi þar fram,“ segir Sigurður Ingi Jóhannsson innviðaráðherra um mögulegt forsetaframboð Katrínar Jakobsdóttur. Hann telur mikilvægt að Katrín ákveði sig og tilkynni um ákvörðun sína áður en þing kemur saman í næstu viku.

Óvíst hvort ríkisstjórnin lifi framboðið af

Eiríkur Bergmann prófessor í stjórnmálafræði telur óvíst hvort ríkisstjórnin lifi það af ef Katrín Jakobsdóttir lætur til skara skríða og býður sig fram til forseta. Miðað við atburðarásina síðustu daga sé líklegt að hún fari fram.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið