Gefur ekki fimm aura fyrir gagn­rýni á Krónuna

Þetta kemur fram í grein framkvæmdastjórans Guðrúnar Aðalsteinsdóttur sem birtist hér á Vísi í kvöld. 

Tilefnið eru skrif Ólafs Haukssonar, almannatengils og hluthafa í Festi, móðurfélags Krónunnar. Þar segir hann að þrátt fyrir að fyrir hafi legið í nóvember á síðasta ári að Wok On tengdist matvælageymslu í Sóltúni þar sem fimm tonn af matvælum fundust innan um rottuskít og ummerki um að búið hafi verið á lagernum, hafi Krónan haldið áfram að selja viðskiptavinum sínum mat frá fyrirtækinu.

Fyrr í þessum mánuði rifti Krónan upp samningi við Wok On, eftir að lögregla réðist í umfangsmiklar aðgerðir sem tengjast ýmissi starfsemi á vegum Davíðs Viðarssonar, en angar málsins ná meðal annars til umræddrar veitingastaðakeðju. Wok On leigði rými hjá Krónunni og var matur frá keðjunni seldur í verslunum hennar. 

„Skýring Ástu Fjeldsted, forstjóra Festis, er sú að Krónan hafi ekki getað lokað stöðunum fyrr vegna þess að þá væri fyrirtækið skaðabótaskylt. Þetta er ótrúlega hallærislegt. Krónan valdi semsagt að setja viðskiptavini í þá hættu að fá matareitrun og þaðan af verra frekar en þurfa að borga mögulegar skaðabætur,“ skrifar Ólafur meðal annars í grein sinni, og þykir nóg um „aumingjagang Krónunnar.“

Wok On hafi lofað öllu fögru

Í aðsendri grein sinni á Vísi í kvöld, sem ber yfirskriftina „Krónan brást strax við“, áréttar Guðrún að í kjölfar fréttanna af matvælalagernum í Sóltúni í nóvember á síðasta ári hafi samningi krónunnar við Wok On verið sagt upp með samningsbundnum uppsagnarfresti.

„Á þessum tímapunkti lá ekki fyrir það sem komið hefur fram í fjölmiðlum síðustu daga um rekstur þessara staða; rökstuddur grunur um mansal og annað glæpsamlegt athæfi. Þegar það lá fyrir var stöðunum lokað, samningi rift og merkingar teknar niður.“

Þá segir Guðrún að Wok On hafi verið rekið af sjálfstæðum rekstraraðilum og á eigin starfsleyfi. Fulltrúar Krónunnar hafi verið fullvissaðir um að engin matvæli af lagernum í Sóltúni hafi verið seld á stöðum Wok On hjá verslunarkeðjunni.

„Að auki staðfestu þáverandi forsvarsmenn Wok On að staðurinn uppfyllti öll skilyrði um heilnæmi og meðferð matvæla en það kemur skýrt fram í samningum Krónunnar að heilbrigðisreglugerðum skuli fylgt í hvívetna af hálfu rekstraraðila. Krónan treysti því að starfsleyfi Wok On yrði afturkallað ef starfsemin uppfyllti ekki skilyrði Heilbrigðiseftirlitsins. Einnig er vert að taka fram að Krónan hefur ítrekað fengið hæstu einkunn frá Heilbrigðiseftirlitinu og alltaf haft það að markmiði að viðhalda hæstu stöðlum í þeim efnum.“

Gera niðurstöðu Heilbrigðiseftirlitsins sýnilegri

Krónan hafi gripið til allra þeirra samningsbundnu og lagalegu úrræða sem vö hafi verið á á hverjum tíma, með velferð viðskiptavina að markmiði. Því sé fjarstæðukennt að halda því fram að Krónan hafi fórnað hagsmunum viðskiptavina sinna til að komast hjá hugsanlegri skaðabótaskyldu.

„Við sjáum það núna í ljósi þessa hörmulega máls að Krónan þarf að gera ítarlegri kröfur á þá sem reka sjálfstæð veitingarými innan verslana varðandi upplýsingagjöf úr niðurstöðum Heilbrigðiseftirlitsins. Krónan mun gera þessar niðurstöður sýnilegar viðskiptavinum staðanna þannig að öllum verði ljóst áður en þeir versla á viðkomandi stöðum hvaða einkunn þeir fá frá Heilbrigðiseftirlitinu. Krónan fagnar auknu gagnsæi og hvetur aðrar matvöruverslanir, mathallir og veitingastaði til að gera slíkt hið sama,“ skrifar Guðrún að lokum.