Með rekstur og fast­eignir út um alla borg

Í gær réðist miðlæg rannsóknardeild lögreglu í umfangsmiklar aðgerðir víða um land. Beindust aðgerðirnar að miklu leyti að fyrirtækjum Davíðs Viðarssonar sem á til að mynda veitingastaði Wok on, Pho Vietnam og þrifafyrirtækið Vy-þrif. Þá var gestum vísað út af gistiheimilum sem eru í eigu Davíðs. 

Davíð keypti Wok on af Kristjáni Ólafi Sigríðarsyni í janúar en mánuði síðar var Kristján dæmdur í skilorðsbundið fangelsi fyrir skattsvik. Kristján áformar uppbyggingu mathallar á Akureyri.

Davíð er upprunalega frá Víetnam og hét Quang Le þangað til í fyrra. Hann kom til landsins upp úr aldamótum ásamt konu sinni og hóf rekstur sinn með versluninni Víetnam market á Suðurlandsbraut.

Allskonar starfsemi

Félögin sem Davíð á eru átta talsins og eru ýmist fasteignafélög, félög utan um rekstur veitingastaða og annað. Þetta eru Vy-þrif, Vietnam Restaurant, Vietnam Market, NQ Fasteignir, EA17 ehf., Vietnam Cuisine, Wokon ehf. og Wokon Mathöll ehf. en síðustu tvö félögin á hann í gegnum NQ Fasteignir. 

Í gegnum þessi félög rekur hann í það minnsta fimm veitingastaði undir merkjum Pho Vietnam við Laugaveg 3, Laugaveg 101, Suðurlandsbraut 8, Skólavörðustíg 42 og Tryggvagötu 20. Hann rekur í það minnsta tvö gistiheimili, Kastali Guesthouse við Kirkjustræti 2 og Reykjavík Downtown Hotel. 

Malað gull

Árið 2022 skilaði VY-þrif 28 milljón króna hagnaði og við árslok átti félagið eignir sem voru metnar á 89 milljónir en félagið á engar fasteignir. 

Vietnam Restaurant ehf. skilaði sex milljón króna tapi árið 2022 en eignir félagsins voru metnar á 89 milljónir undir lok árs. Félagið á fasteign í kjallaranum á Laugavegi 27 þar sem í dag má finna Vínstúkuna 10 sopa.

Vietnam Market skilaði tæplega milljón króna hagnaði árið 2022 en heildareignir félagsins eru metnar á 52 milljónir króna. Félagið á engar fasteignir.

NQ fasteignir skilaði 57 milljón króna tapi árið 2022 en á sama tíma fóru heildareignir félagsins úr 64 milljónum króna í 529 milljónir króna. Má ætla að kaup á Herkastalanum við Kirkjustræti 2 vegi þar þungt en félagið keypti hann í ágúst það ár. Þar er gistiheimilið Kastali Guesthouse rekið. Félagið á einnig Reykjavíkurveg 66 í Hafnarfirði þar sem má finna veitingastað WokOn.

Í gegnum NQ Fasteignir á Davíð hundrað prósent hlut í bæði Wokon ehf. og Wokon Mathöll ehf.. Þau tvö félög reka níu veitingastaði undir merkjum Wokon. Wokon ehf. skilaði 32 milljón króna hagnaði á síðasta ári og heildareignir eru 140 milljón króna. Félagið á engar fasteignir. 

Wokon Mathöll ehf. skilaði 600 þúsund króna hagnaði árið 2022 og eru heildareignirnar metnar á 43 milljónir króna. Félagið á engar fasteignir. 

EA17 ehf. skilaði sex milljón króna hagnaði árið 2022 og heildareignir félagsins eru metnar á 35 milljónir króna. Félagið á engar fasteignir. 

Vietnam Cuisine ehf. skilaði hagnaði upp á 53 milljónir króna árið 2022 og heildareignir félagsins eru metnar á 270 milljón króna. Félagið á engar fasteignir en rekstrartekjur félagsins hafa verið frá 24 milljónum og upp í 396 milljónir króna síðustu fjögur ár.

Heildareignir félaganna átta nema 1,25 milljörðum króna, mest í Vietnam Cuisine og NQ Fasteignir. Upplýsingar sem fréttastofa hefur um eignir félaganna miðast við árið 2022 þar sem ekki er búið að birta ársreikninga fyrir árið 2023.

Þá hafði Davíð áform um að opna mathöll á Vesturgötu 2 í miðbænum þar sem Kaffi Reykjavík var rekið um árabil. Framkvæmdir standa yfir í húsinu.

Upphaflega kom fram í þessari frétt að Davíð sæi enn um rekstur Vietnam Market en það er ekki rétt og hefur það verið leiðrétt.