Gengur vel að undir­búa verð­mæta­björgun í Grinda­vík

Verðmætabjörgun hefst klukkan átta á morgun og stendur til klukkan 21. Á mánudag heldur hún svo áfram á sama tíma.

Hjördís Guðmundsdóttir, samskiptastjóri almannavarna, segir fólk mega samnýta flutningabíl á morgun þegar verðmætabjörgun heldur áfram í Grindavík. Almannavarnir sjá um skipulag verðmætabjörgunar en hægt er að skrá sig í hana á vefnum island.is til klukkan fimm í dag.

„Við erum að stýra þessu og það er her manns að skipuleggja þessar aðgerðir á morgun,“ segir Hjördís um verðmætabjörgunina á morgun.

Íbúar eru sumir ósáttir við fyrirkomulagið sem hefur verið sett á verðmætabjörgun. Sem dæmi hefur það verið gagnrýnt að sama flutningabílinn megi ekki nota í að færa verðmæti úr fleiri en einu húsi. Það sé erfitt að fá flutningabíl og því hafi margir hugsað sér að nota sama bílinn. Það hafi ekki verið leyfilegt.

Hjördís segir að þetta sé ekki rétt. Fólk megi samnýta flutningabíla innan hvers hólfs.

„Það má sama bílinn og þeir sem hjálpa öðrum geta farið inn á ákveðið svæði og beðið eftir næsta holli.“

En má fara á bílnum úr einu húsi í annað þegar þú ert kominn inn?

„Jú, það má.“

Margir vilja aðstoð

Almannavarnir hafa boðið íbúum aðstoð við pökkun og við flutning á innbúi. Hjördís segir að fjölmargir hafi skráð sig í það og á von á því að fjölmennt verði í Grindavík á morgun. Hún segir að þau eigi von á því að sumir flytji heilar búslóðir og einhverjir að taka smáhluti.

„Það eru eflaust margir að sækja búslóð sem eru komnir í leiguhúsnæði. Einhverjir ætla að tæma á meðan aðrir eru að sækja eitthvað smá.“

Almannavarnir hafa boðið fólki að setja dót sitt í geymslu sé það ekki með pláss í því húsnæði sem það er í núna. Hún segir að um sé að ræða geymsluhúsnæði á Reykjanesi en það sé unnið að því að fá meira geymslupláss fyrir þau.

Á von á því að margir nýti tækifærið

„Það er verið að undirbúa aðgerðir morgundagsins eins og á mánudag,“ segir Úlfar Lúðvíksson lögreglustjóri á Suðurlandi og að vettvangsstjórn sé nú við störf inni í Grindavík.

Fram kom í tilkynningu lögreglu fyrr í dag að píparar og rafvirkjar gangi nú hús úr húsi í Grindavík ásamt viðbragðsaðilum. Þeir kanna hvort hiti og rafmagn sé í húsum Grindvíkinga.

Úlfar á von á því að margir ætli sér að fara til Grindavíkur á morgun til að sækja verðmæti á heimili sín en til þess að geta það þarf það að skrá sig á www.island.is Úlfar segir að fólk hafi til fimm í dag til að skrá sig.

„Ég á von á því að Grindvíkingar nýti morgundaginn og eins mánudaginn til þess að heimsækja sín heimili. Þau hafa hafa rúman tíma á morgun og á mánudag til að vitja eigna sinna. Það er ekki gert ráð fyrir því að fólk sé að fara annað en á sín heimili,“ segir Úlfar og að hver hafi um sex klukkustundir til að fara inn.

Aðgerðir eftir að myrkur skellur á

Í tilkynningu frá almannavörnum í gær kom fram að hluti aðgerða muni fara fram eftir að myrkur skellur á og því hvetja almannavarnir fólk til að vera með höfuð- eða vasaljós ef ske kynni að rafmagnsbilun sé í þeirra svæðishólfi.

Aðkoma að Grindavík verður bæði um Suðurstrandarveg og Nesveg en ekið er frá Grindavík um Grindavíkurveg. Þá þarf sérstaka heimild til notkunar á gámaflutningabifreiðum en ökutæki sem krefjast stærra meiraprófs eru leyfð.

Fólki er sagt að keyra beint að húsi sínu og það eigi ekki að fara um bæinn. Víða séu opnir skurðir þar sem unnið er að viðgerðum og mikið af sprungum sem ekki er búið að loka en reynt hefur verið að girða af.

Fólk sem ætlar að sækja lykla sína í slökkvistöðina er bent á að senda tölvupóst þess efnis á slokk@grindavik.is. Með því að senda tölvupóst sé hægt að koma í veg fyrir að bíða í röð eftir að fá lykilinn afhentan. Íbúar eru beðnir um að senda hvenær þeir komi ásamt heimilisfangi.

Fréttin hefur verið uppfærð. Fyrst stóð að fólk mætti ekki samnýta flutningabíla en almannavarnir leiðréttu það og því hefur fréttinni verið breytt. Fréttinni var breytt klukkan 16:25 þann 3.2.2024.