Haldi þróunin á­fram muni birgðir nýrra í­búða klárast á árinu

Þetta er fullyrt í tilkynningu frá Húsnæðis- og mannvirkjastofnunar, HMS, en þar segir að byggt hafi verið á upplýsingum sem stofnunin hafi unnið úr gögnum um fasteignaauglýsingar.

Þar segir að framboðið á höfuðborgarsvæðinu og í nágrannasveitarfélögum hafi minnkað um ellefu prósent á síðustu sex vikum síðasta árs, og á síðustu sex mánuðum hafi það dregist saman um tæplega helming. Fram kemur að samdrátturinn sé að eiga sér stað um allt land, en hann sé mestur á höfuðborgarsvæðinu.

„Samkvæmt gögnum HMS hefur nýjum auglýstum íbúðum fækkað hratt á síðustu sex mánuðum í nágrenni höfuðborgarsvæðisins, en þær voru 200 talsins um síðustu áramót samanborið við 320 um miðjan júní 2023. Á höfuðborgarsvæðinu jókst hins vegar framboð nýrra auglýstra íbúða frá miðjum júní fram í miðjan nóvember úr 530 í 950, en í lok síðasta árs hafði þeim svo fækkað niður í 850,“ segir í tilkynningu HMS.

Samkvæmt HMS er um helmingur allra þeirra tvö þúsund íbúða sem eru til sölu á höfuðborgarsvæðinu með fjögur eða fleiri herbergi. Um 350 þeirra eru litlar íbúðir, sem er skilgreint sem íbúðir með tvö herbergi eða færri. Og um 650 íbúðanna eru þriggja herbergja.

Í nágrannasveitarfélögum höfuðborgarsvæðisins og annars staðar á landinu er samsetning framboðs íbúða sambærileg og megnið eða rúmlega 400 íbúðir fjögurra herbergja eða stærri, um 150 þriggja herbergja og um fimmtíu litlar íbúðir.

Fram kemur að af þeim 850 nýju íbúðum sem eru auglýstar til sölu eru um 37 prósent í Reykjavík, 22 prósent í Hafnarfirði annars vegar og í Kópavogi hins vegar, og þá eru 17 prósent í Garðabæ.

Í nágrannasveitarfélögum höfuðborgarsvæðisins hefur framboð íbúða aukist mest undanfarið í Reykjanesbæ, Árborg og á Akranesi. Í tveimur síðarnefndu sveitarfélögunum á þessi þróun sér stað vegna nýrra íbúða, en þeim hefur fjölgað lítillega í Reykjanesbæ.