U-18 ára lands­liðið í undan­úr­slit

Landslið karla í handbolta skipað leikmönnum 18 ára og yngri lék tvo leiki á Sparkassen Cup í Þýskalandi. Liðið lék fyrsta leik sinn á mótinu í gær þegar liðið vann öruggan sigur á liði skipuðu leikmönnum frá Saar-héraði í Þýskalandi.

Í fyrri leik dagsins mætti liðið heimaliði Þjóðverja. Heimamenn tóku forystuna snemma og leiddu 13-8 í hálfleik. Á heimasíðu HSÍ kemur fram að strákarnir hafi byrjað síðari hálfleikinn af krafti en Þjóðverjar sigur síðan fram úr. Lokatölur 26-18 fyrir Þýskaland.

Ágúst Guðmundsson og Jens Bragi Bergþórsson fóru fyrir íslenska liðinu í markaskorun, Ágúst skoraði 6 mörk en Jens Bragi 5.

Í seinni leik dagsins voru mótherjarnir Belgar. Þar var ljóst snemma að íslenska liðið var sterkara og var tólf marka munur í hálfleik, staðan þá 17-5. Íslensku strákarnir héldu áfram að hamra járnið eftir hlé og unnu að lokum nítján marka sigur. Lokatölur 33-14.

Antoine Óskar Pantano var markahæstur í íslenska liðinu með 9 mörk en Daníel Montoro skoraði 8. 

Með sigrinum tryggði íslenska liðið sér sæti í undanúrslitum mótsins.