Viðskipti erlent

Skera niður hjá úr­eltri Alexu

Samúel Karl Ólason skrifar
Niðurskurðarhnífurinn hefur verið á lofti hjá Amazon á árinu.
Niðurskurðarhnífurinn hefur verið á lofti hjá Amazon á árinu. AP/Michael Sohn

Forsvarsmenn Amazon hafa ákveðið að segja upp starfsmönnum sem komið hafa að þróun talgervilsins Alexa. Meiri áherslu á að leggja á þróun gervigreindar eins og ChatGPT.

Ekki liggur fyrir hve mörgum verður sagt upp en samkvæmt frétt Reuters er um að ræða nokkur hundruð starfsmenn.

Í pósti til starfsmanna sagði einn yfirmanna deildarinnar sem haldið hefur utan um spjallþjarkan Alexa að markmiðið með breytingunum væri að nýta auðlindir fyrirtækisins best í samræmi við forgangsverkefni fyrirtækisins og það hvað skiptir áhorfendur mestu máli. Það væri þróun gervigreindarforrits.

Daniel Rausch, áðurnefndur yfirmaður, sagðist vongóður um að innleiðing gervigreindar og mállíkans í Alexu myndi vegnast vel og sagði mikinn árangur þegar hafa náðst.

Alexa er líklega þekktasti spjallþjarki heimsins, kannski í öðru sæti á eftir Siri, og um tíma störfuðu um fimm þúsund manns við þróun hennar og Echo-hátalaranna sem tengjast henni. Alexa byggir þó á tækni sem þykir nú úrelt.

Gervigreindarforrit eins og Chat GPT frá Open AI, Bing frá Microsoft og Bard frá Google njóta mikillar athygli þessa dagana. Þar er um að ræða forrit sem geta búið til texta, kóða, myndir og annað, eftir spurningum og ráðleggingum notenda.

Segl hafa verið dregin saman í öðrum deildum Amazon að undanförnu og má þar nefnda tónlistardeild fyrirtækisins og tölvuleikjadeild. Reuters segir hluta starfa sem lögð hafa verið niður í öðrum deildum hafa komið að Alexa.

Niðurskurðarhnífurinn hefur verið mikið á lofti hjá Amazon, einhverju stærsta fyrirtækis heims, á árinu, þar sem sala hefur dregist saman. Þrátt fyrir þann samdrátt skilaði aflaði fyrirtækið töluvert meiri tekna á þriðja ársfjórðungi en greinendur bjuggust við.

Í frétt CNBC segir til að mynda að fyrr á árinu hafi fyrirtækið framkvæmt stærstu hópuppsögn í sögu Bandaríkjanna, þegar 27 þúsund manns var sagt upp. Samhliða því voru nokkrar af óarðbærum deildum fyrirtækisins lagðar niður.


Tengdar fréttir

Amazon sakað um belli­brögð með Prime-á­skriftir

Alríkisviðskiptastofnun Bandaríkjanna (FTC) stefndi tæknirisanum Amazon fyrir að blekkja viðskiptavini sína til þess að skrá sig í áskriftarþjónustu og gera þeim erfitt fyrir að segja henni upp. Fyrirtækið hafnar ásökununum alfarið.

Starfs­maður Amazon Ring njósnaði um konur með dyra­bjöllu­mynda­vél

Fyrrverandi starfsmaður dyrabjöllumyndavéladeildar tæknirisans Amazon njósnaði um konur með myndavélum í bað- og svefnherbergjum um nokkurra mánaða skeið árið 2017. Þetta kemur fram í sátt sem bandarísk yfirvöld gerðu við fyrirtækið vegna brota á persónuverndarlögum.

Segja upp 18 þúsund manns

Forstjóri bandaríska vefverslunarrisans Amazon segir að til standi að segja upp 18 þúsund manns sem hluti af aðgerðum til að draga úr rekstrarkostnaði.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×

Velkomin á Vísi. Þessi vefur notar vafrakökur. Sjá nánar.