Palli var einn í heiminum í fyrsta sinn á sviði

Hún er byggð á samnefndri barnabók eftir Jens Sigsgaard sem kom fyrst út árið 1942. Bókin hefur allar götur síðan notið gríðarlegra vinsælda, komið út á yfir 40 tungumálum og selst í milljónum eintaka. Þetta er þó í fyrsta sinn sem hún er sett upp á leiksviði en Bjarni Haukur Þórsson, handritshöfundur og leikstjóri, fékk hugmyndina að leikritinu þegar heimsfaraldurinn stóð sem hæst og götur borga voru auðar og ekki sála á ferð. Bókin fjallar einmitt um Palla sem vaknar einn morguninn og er aleinn í heiminum.

„Sagan er bæði skemmtileg og ógnvænleg, dálítið eins og Black Mirror, nema fyrir börn. Hún er full af góðum gildum og inniheldur mikilvægan boðskap. 

Palla finnst til að byrja með gaman að vera einn og geta gert það sem honum sýnist en hægt og rólega verður það minna gaman. Hann lærir þá mikilvægu lexíu að það er fólkið sem skiptir máli en ekki hlutirnir,“ segir Ólafur

Hann segir sýninguna vera augnakonfekt fyrir áhorfendur og kynslóðir ættu að geta skemmt sér saman.

„Sýningin er mjög hress og skemmtileg og trú sögunni þó svo einhver smáatriði hafi verið færð til. Bókin er skrifuð á fimmta áratugnum og ýmislegt sem búið er að staðfæra og uppfæra. Í bókinni óskar Palli sér þess til dæmis að eignast hníf en í leikritinu verður það hjólabretti. Eins eru engir sporvagnar á Íslandi. Sýningin er full af tónlist eftir Frank Hall, Eva Björg Harðardóttir gerir leikmyndina og Steinar Júlíusson gerir teiknimyndir sem varpað er upp. Úr verður mjög skemmtilegt samspil,“ segir Ólafur.

Þetta er í fyrsta sinn sem hann frumsýnir leikverk fyrir börn í atvinnuleikhúsi en áður hefur hann leikið í barnasýningum, meðal annars stokkið inn í sýningar um Karíus og Baktus fyrr á árinu. Hann segir ákveðna áskorun að standa einn á sviðinu.

„Það er auðvitað aðeins öðruvísi hvað varðar leikstíl og skýrileika, að þurfa að bregðast við sjálfum sér en ekki öðrum leikurum eða upplýsingum utan frá. Við Bjarni unnum saman í handritinu í tvær vikur og svo fór ég bara að læra. Í einleik snýst þetta um textann, að hann sé stimplaður inn í mann því það verður enginn á sviðinu að hjálpa mér að muna hann, en þetta er bara starf leikarans.“

Sýningar hefjast á laugardaginn í Hörpu og hægt að tryggja sér miða hér.