Kristinn nýr fram­kvæmda­stjóri Eyrir Venture Mana­gement

Í tilkynningu segir að Kristinn muni leiða félagið sem fari með rekstur og stýringu á fjárfestingasjóðunum Eyrir Vöxtur og Eyrir Sprotar og eignarhaldsfélaginu Eyrir Ventures til viðbótar við umsýslu á hlutum í hátæknifyrirtækinu Carbon Recycling International. 

„EVM hefur komið að fjárfestingum í fjölda fyrirtækja og má sem dæmi nefna félögin Sæbýli, Activity Stream, Atmonia, Pay Analytics og Laki Power. Kristinn tekur við starfinu af Erni Valdimarssyni.

Kristinn hefur víðtæka reynslu af fjárfestingum og fjármálum en hann kemur til EVM frá fjárfestingafélaginu Silfurberg ehf. þar sem hann gengdi starfi fjármálastjóra. Silfurberg sérhæfir sig í fjárfestingum á sviði lífvísinda- og tæknigreina. Hann starfaði einnig í níu ár sem fjárfestingastjóri hjá Framtakssjóði Íslands og sá um endurskipulagningu og síðar sölu á félögum úr eignasafni sjóðsins. Þar áður var hann sérfræðingur í fyrirtækjaráðgjöf hjá Landsbankanum.

Ásamt því að hafa séð um endurskipulagningu og kaup og sölu á fjölda fyrirtækja hefur hann setið í mörgum stjórnum bæði innlendra og erlendra félaga. Má þar nefna félög á borð við Invent Farma, Advania, Icelandic Group, N1 og Húsasmiðjuna og tekið þátt í að leiða skráningu fyrirtækja á markað. Kristinn er með Bsc í viðskiptafræði og Msc í fjármálum frá Háskóla Reykjavíkur,“ segir í tilkynningunni.