Innlent

Bjarni tilkynnir væntanleg ráðherraskipti á sunnudag

Heimir Már Pétursson skrifar
Jón Gunnarsson dómsmálaráðherra segir slæmt ekki tókst að koma breytingum á lögreglulögum og frumvörpum um sameiningu héraðsdómstóla og sýslumannsembætta í gegn á Alþingi á vorþingi.
Jón Gunnarsson dómsmálaráðherra segir slæmt ekki tókst að koma breytingum á lögreglulögum og frumvörpum um sameiningu héraðsdómstóla og sýslumannsembætta í gegn á Alþingi á vorþingi. Stöð 2/Steingrímur Dúi

Fastlega er búist við að Jón Gunnarsson láti af embætti dómsmálaráðherra á ríkisráðsfundi á mánudag og Guðrún Hafsteinsdóttir þingmaður flokksins á Suðurlandi komi inn í ríkisstjórn í hans stað.

Guðrún Hafsteinsdóttir kemur úr Suðurkjördæmi þar sem lengi hefur verið þrýst á innan Sjálfstæðisflokksins að kjördæmið fengi ráðherra.Vísir/Vilhelm

Núverandi ríkisstjórn Katrínar Jakobsdóttur tók við af fyrri stjórn hennar með Framsóknarflokki og Sjálfstæðisflokki hinn 28. nóvember árið 2021. Þegar stjórnarsáttmálinn var kynntur boðaði Bjarni Benediktsson formaður Sjálfstæðisflokksins og fjármálaráðherra aðbreytingar yrðu á ráðherraskipan flokksins að 18 mánuðum liðnum. Þá kæmi Guðrún Hafsteinsdóttir í ríkisstjórn í stað Jóns Gunnarssonar dómsmálaráðherra.

Boðað hefur verið til ríkisráðsfundar á Bessastöðum klukkan tíu á mánudagsmorgun þar sem boðuð ráðherraskipti fara væntanlega fram. Óli Björn Kárason þingflokksformaður Sjálfstæðisflokksins staðfestir að stefnt sé að þingflokksfundi á sunnudag en verst allra frétta um dagskrá fundarins.

Bjarni hefur hins vegar ítrekað sagt í fjölmiðlum að fyrri áætlun hans um að Guðrún Hafsteinsdóttir komi í ríkisstjórn á miðju kjörtímabili standi. Þá var ekki annað að heyra á Jóni Gunnarssyni eftir ríkisstjórnarfund á þriðjudag að hann væri á förum úr ríkisstjórn.

Muntu sjá eftir því að fara úr dómsmálaráðuneytinu ef sú verður raunin?

Jón Gunnarsson dómsmálaráðherra kemur úr Suðvesturkjördæmi, sama kjördæmi og Bjarni Benediktsson formaður Sjálfstæðisflokksins.Sigurjón Ólason

„Já, já það er alltaf eftirsjá fyrir þann sem er í pólitík að hverfa úr þessu. Við erum að mörgu leyti úti í miðri á en svona er bara pólitíkin stundum. Það verður bara að koma í ljós hver ákvörðun þingflokks og formanns í flokknum verður í þessum efnum.“

Og þú munt styðja hans tillögu hver sem hún verður?

„Já, það er nú vaninn í okkar flokki að formaður kemur með tillögu sem þingflokkurinn samþykkir,“ sagði Jón að loknum ríkisstjórnarfundi á þriðjudag.

Formenn flokka halda yfirleitt þétt að sér spilunum áður en þeir leggja tillögur um ráðherraskipan fyrir í þingflokkum sínum og Bjarni Benediktsson hefur ekki verið nein undantekning á því. Þótt líklegt verði að teljast að Jón og Guðrún hafi vistaskipti er hins vegar ekki hægt að útiloka að Bjarni skáki einnig ráðherrum sínum til á milli embætta, eða geri aðrar breytingar. Það kemur allt í ljós eftir þingflokksfundinn á sunnudag.

Ríkisstjórn Katrínar Jakobsdóttur Sjálfstæðisflokkurinn Forseti Íslands

Tengdar fréttir

Segir Ísland í „stórkostlegum vandræðum“ í útlendingamálum

Dómsmálaráðherra segir Ísland í svo „stórkostlegum vandræðum“ í útlendingamálum að það gangi ekki lengur. Hann segir „öfgafulla“ umræðu og ráðherra Vinstri grænna meðal annars standa í vegi þess að hægt sé að taka upp harðari stefnu í málaflokknum.

Jón nánast örugglega á förum úr ráðherraliðinu

Boðað hefur verið til ríkisráðsfundar á mánudaginn næsta og ekki er gert ráð fyrir öðru en að þá verði gengið frá breytingum á ráðherraliði í ríkisstjórn Katrínar Jakobsdóttur: Að Jón Gunnarsson hverfi úr ríkisstjórn og Guðrún Hafsteinsdóttir komi inn.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið