Sam­þykkja aukningu hluta­fjár Ljós­leiðarans

Fram kemur í tilkynningu frá Ljósleiðaranum að fyrirtækjaráðgjöf Arion banka hafi verið ráðin sem ráðgjafi og muni hafa umsjón með sölu á nýju hlutafé. 

Kerfi Ljósleiðarans

Fram kemur að markmið hlutafjáraukningar sé að efla Ljósleiðarann ehf. til lengri tíma litið á heildsölumarkaði fjarskipta. Fjáraukningin muni þá nýta tækifæri sem uppbygging á nýjum og öflugri fjarskiptalandshring Ljósleiðarans mun leiða af sér. Í krafti þess umboðs verði unnið að frekari undirbúningi af hálfu Orkuveitu Reykjavíkur og Ljósleiðarans.

Ljósleiðarinn á og rekur ljósleiðaranet sem nær nú til um 125 þúsund heimila og fyrirtækja í landinu. Öll helstu smásölufyrirtæki landsins á fjarskiptamarkaði nýta netið til að veita heimilum og fyrirtækjum þjónustu sína. Nýi landshringurinn mun ná hringinn í kringum landið og til Vestfjarða. Fjarskiptafyrirtæki og fleiri nýta sér það stofnnet til gagnaflutnings innan sinna kerfa þar sem flutningur innan farsímakerfanna er umfangsmestur.

Aukning á hlutafé gagnrýnd

Ákvörðunin um að fá einkaaðila inn í Ljósleiðarann hefur verið gagnrýnd og til mikillar umræðu á samfélagsmiðlum. Sósíalistar hafa verið þar fremstir í flokki. Trausti Breiðfjörð Magnússon og Sanna Magdalena Mörtudóttir borgarfulltrúar Sósíalista hafa lýst þeirri skoðun að meirihluti Samfylkingar starfi í bága við hugsjón jafnaðarmanna og hafi selt frá sér grunninnviði borgarinnar.

„Það er eitt að halda fínar ræður og skrifa háfleyga pistla þann 1. maí um mikilvægi verkalýðsbaráttu. Svo er annað hvaða verk eru unnin 2. maí og alla aðra daga ársins í þágu almennings og launafólks,“ skrifar Trausti í færslu á Facebook.

Einnig hefur komið gagnrýni frá sjálfstæðismönnum vegna skorts á upplýsingaflæði. Meirihlutinn hefur þó borið fyrir sig að trúnaðarskylda hafi ríkt um forvinnu á sölu Ljósleiðarans.

Samþykktir sveitarfélaganna

Í tilkynningu til Kauphallar 24. október 2022 greindi Ljósleiðarinn frá samþykkt hlutahafafundar á tillögu stjórnar fyrirtækisins. Samþykktin var gerð með fyrirvara um staðfestingu frá eigendum OR, Reykjavíkurborg, Akraneskaupstað og Borgarbyggð.

Bæjarstjórn Akraness fagnar aukningu hlutafjár til að styrkja samkeppnisstöðu fyrirtækisins og efla þar með samkeppnisstöðu Íslands og fjarskiptaöryggi landsins.

Bæjarstjórnin samþykkti allt að 33,3% af heildarhlutafé félagsins, þannig að eignarhlutur Orkuveitu Reykjavíkur í félaginu verði aldrei minni en 66,67% af heildarhlutafé Ljósleiðarans ehf.

Eins og fram kemur að framan er gert ráð fyrir tiltekinni verkaskiptingu stjórnar Orkuveitu Reykjavíkur og stjórnar Ljósleiðarans í því ferli sem fram undan er. Mótun þess er nú undirbúin í samstarfi þeirra og fyrirtækjaráðgjafar Arion banka, en bankinn hefur verið ráðinn til ráðgjafar og umsjónar í ferlinu.